УВЕР ЙОГЫН

Тауштымо семын — памятник

Кушкыжмын Йошкар-Оласе Воскресенский паркыште герой-пожарный ден утарыше-влаклан памятникым шогалтышашлан негызлык кӱм пыштышт.

Кӱм пыштыме торжественный церемонийыш республикысе правительствын министрже — республик вуйлатышын полномочный представительже Сергей Трухин,  Йошкар-Олан мэрже Евгений Маслов, икмыняр моло толыныт ыле. Правительствын министрже погынышо-влакым Марий Эл вуйлатышын пашажым жаплан шуктышо Александр Евстифеевын лӱмжӧ дене республикын пожарно-утарыше службыжын историйыштыже  кӱлешан событий дене погынышо-влакым саламлыш.

— Пожарный ден утарыше-влаклан памятникым шогалтымаш – тиде чынже денак исторический событий. Тендан профессийда уло тӱняште ик эн лӱдыкшӧ. Шкем чаманыде, шке нерген шоныде, те еҥ-влаклан да пӱтынь эллан полшеда. Паша лектышда – тӱжем дене утарен кодымо илыш. Ончыкыжым тиде паркыште ветеран, пожарный, утарыше да олаште илыше-влак чумыргаш тӱҥалыт манын ӱшанем, — палемдыш Сергей Трухин.

Тачысе кечын республикыште лӱдыкшыдымылыкым 6,5 тӱжем еҥ арала – тиде Россий МЧС-ын Марий Элысе тӱҥ управленийжын личный составше, Экологий лӱдыкшыдымылык департамент да тушко пурышо подразделений-влак, тыгак добровольный пожарный команде-шамыч. Ӱмаште гына, мутлан, пожарный-влак  809 вере тулым да йӱлаш тӱҥалше тӱжем утла верым йӧртеныт, 410 еҥын илышыжым утарен коденыт, утарыше-влак вӱд йымаке каяш тӱҥалше 32 еҥым серыш луктын шуктеныт. Сандене пожарный ден утарыше-влаклан шогалтышаш тиде памятник лӱддымылыкым да героизмым ончыктымыштлан тауштымо семын лиеш.  

Ончыкыжым тудын воктене Россий МЧС-ын Марий Элысе тӱҥ управленийжын кӱлешан ведомственный мероприятийже-влакым  эртараш палемдат. Памятник пожарный ден утарыше, поро кумылан еҥ да мер организаций-влакын ойырымо оксашт дене ышталтеш да вераҥдалтеш.

Тыршен пашам ыштыше-влаклан наградым, Чап грамотым, Тауштымашым кучыктымо деч вара памятникым шындышаш верыш шнуй шӱлышым пуртышт. Пытартышлан, вуйыштым пыштыше пожарный ден утарыше-влакым шарналтен, погынышо-влак кӱ ӱмбаке пеледышым пыштышт.

Любовь Камалетдинова.

Опубликовать в Одноклассники

Добавить комментарий