КУЧЕМЫШТЕ

Тичмашын да кумдан эртышаш

Марий Элым вуйлатыше Александр Евстифеев тазалыкым пеҥгыдемдыме йоча лагерьыш путёвкын акшым субсидироватлаш кӱштен.
«Мемнан тачысе задачына – тазалыкым пеҥгыдемдыме кампанийыш утларак йочам ушаш, сандене тиде полышым изи доходан еш-шамычлан пуаш кӱлеш», – 2021 ийысе кеҥеж кампанийлан ямдылалтме йодыш шотышто совещанийыште манын тудо.
Тыгодым регионым вуйлатыше лагерьысе чыла пашаеҥын кеҥеж марте вакцинироватлыме лиймыштлан поснак кугу тӱткышым ойырен.
Тылеч посна, муниципальный образований администрацийлам вуйлатыше ден министерстве-влаклан йоча-шамычын каныме верлаштышт материально-технический базым тергаш да иктешлымашым ышташ каласен.
«Тиде темым ӱмаштат уло кумылын каҥашаш ямде улына ыле, но тунам йоча-влакын кеҥеж канышыштым чот «пӱчкедаш» логале. Тений тудо тичмашын да кумдан эрта манын ӱшанем», – ойлен регионым вуйлатыше.
Ончылгоч палемдыме почеш, тений кеҥежым Марий Элыште йоча-влаклан каныме да тазалыкым пеҥгыдемдыме 184 организаций пашам ышташ тӱҥалеш, тушто 16 тӱжем наре ӱдыр-рвезе, ты шотыштак неле илыш йыжыҥыш логалше 7 тӱжем утла икшыве, канен кертеш.
2 тӱжем наре тунемше субъект деч ӧрдыжтӧ кана, ты шотыштак 300 наре еҥ «Артек», «Орлёнок», «Смена», «Сириус» федеральный рӱдер-шамычын сменылаштышт, РФ Тазалыкым аралыме министерствын федеральный кӱлешлыкан санаторийлаштыже лиеш,
Тыгеракын, кандарыме, тазалыкым пеҥгыдемдыме, яра жапым пайдалын эртарыме йӧн дене 7 гыч 18 ияш марте 62 тӱжем утла (чумыр чот гыч 72 процент наре) ӱдыр ден рвезым авалташ палемдыме.
Минобрнаукын, Минздравын да Роспотребнадзорын темлымышт деч вара сменын кужытшо деч чотшым рашемеш.
Роспотребнадзорын Марий Элысе виктемже продукт ден кочкыш сырьём кондыштарыше-влакын реестрыштым ямдыла. Кочкыш продуктым кондыштарыме нерген ойпидыш тазалыкым пеҥгыдемдыме 170 организацийыште, шинчымашым пуымо тӧнежыште, уже уло. Ола деч ӧрдыжтӧ верланыше организаций-шамыч кочкыш продуктым налме аукционлан документым ямдылат.
Должностьышто улшо 1005 еҥым гигиене йодыш шотышто аттестацийлан ямдылаш, вирусан пудий энцефалит да боррелиоз дене черланыме деч ола деч ӧрдыжтӧ верланыше чыла 13 организацийыште обработкым ышташ палемдыме.
Марий Эл Республикым вуйлатышын организаций да
аналитике виктемжын уверже негызеш
М.ИВАНОВА ямдылен

 
Опубликовать в Одноклассники

Добавить комментарий