Эртыше арнясе тыглай да каныш кечылаште республикысе чыла гаяк районышто электровийым кучылтмым шотлышо приборлам тергыме рейд кумдан эртен.
Тушко 500 утла еҥым – филиалысе чыла подразделений ден департаментын вуйлатышышт ден специалистыштым кычкыме. Кажне тӱшкаште лӱдыкшыдымылык службын да тергыше инспекцийын пашаеҥышт лийыныт.
Тыгай рейд кеч-кунамат пайдале: арня жапыште 37 тӱжем счётчикын ончыктымыжым тергыме, кучылтмо электровийын шотлалтде кодмыж нерген 34 актым ыштыме. Тушечын 32 фактше 141036 киловатт-шагатым шотлыдегеч да 2 фактше 30350 киловатт-шагатым договор деч посна кучылтмо дене кылдалтыныт.
«Мариэнерго» электровийым шолыштмо ваштареш эреак да радамлын кучедалеш. 2021 ий тӱҥалтыш гыч лӱдыкшыдымылык службын да тергыше инспекцийын полшымышт дене электровийым шотлымо да договор деч посна кучылтмо нерген 43 актым ыштыме. Правам аралыше органлашке 41 йодмашыже РФ КОАП-ын 7.19 статьяже да 2 йодмашыже РФ УК-н 165 статьяж почеш мутым кучыкташ пуалтыныт.
Энергетик-влак рейд годым тыгак профилактике пашам шуктат, электросетьыш шкевуя ушнен, электровийым кучылтмын лӱдыкшӧ улмыж нерген умылтарат.
«Мариэнерго» вуйлатышын ойлымыж почеш, кодшо ийын филиал сетьлаште электровий йоммашым ончылийысе деч 8225628 киловатт-шагатлан иземден. Тидыже филиалын шуктен толмо тӱрлӧ организационный ден технический мероприятийын пайдале улмыж нергенак ойла. Ты шотышто пашам умбакыже шуяш шонат.
Энергетик-влак республикыште илыше калык деч йодыт: электросетьыш закондымын ушнымым ужыда гын, «Рӱдӧ да Юл кундем МРСК» ПАО-н контакт-рӱдерышкыже кече мучко пашам ыштыше 8-800-220-0-220 телефон дене яра йыҥгыртен але http://www.mrsk-cp.ru/contacts/soobhchit-o-khishcheniyakh-elektroenergii/ сайтыш уверым колтен кертыда.
Тендан йыҥгыртымыда чын тӱлен шогышо потребитель-влакын электровийышт йӧрыкталтме деч полша, вет тудым шолып да лӱдыкшыдымылык правилым шотыш налде кучылтмаш сетьыште напряжений кенета вашталтмашке шукта. Тидлан кӧра мӧҥгысӧ электроприбор локтылалтеш, электровийым пуэн шогымо качестве начарештеш, пожар да эмганен кертме лӱдыкшӧ ышталтеш. Энергийым шолыштшо-влакын осал пашаштлан кӧра электросеть компаний веле огыл, тыгак тудым кучылтмылан жапыштыже тӱлен шогышо граждан-влакат нелылыкыш логалыт.
Ю.ИСАКОВ
