19-27 мартыште Йошкар-Олаште «Театральный Йошкар-Ола» фестиваль эртыш.
Арня жапыште рӱдолаштына илыше да унала толшо-влак республикысе профессиональный куд театр коллективын пашажым ончен кертыныт. Фестивальыш театр-влак эртыше тургымышто шындыме эн сай постановкыштым аклаш луктыныт. Спектакльын сценографийжым, режиссуржым, артист-влакын рольым модмыштым, содержанийым тӱрыс почын пуымыштым Армине Оганесян («Пять вечеров на Кипре» театр фестивальын арт-директоржо), Валентина Федорова (театровед, «Вахтаноговец» газетын тӱҥ редакторжо) да Ольга Галахова (театровед, Малый театрын художественный вуйлатышыжын алмаштышыже, ГИТИС-ын преподавательже) акленыт.
Фестивальын почётан унаже семын ГИТИС-ын ректоржо, журналист, критик Григорий Заславский лийын. Театр-влакын постановкыштым каҥашымашке эше ончыкылык театровед, ГИТИС-ыште тунемше кум ӱдыр ушнен.
– Марий Элыште, тудын рӱдолаштыже икымше гана улам. Фестиваль жапыште ончымо кок спектакльым кужу жап шарнаш тӱҥалам. Георгий Константинов лӱмеш руш академический драме театрын «Вечера на хуторе близ Диканьки» спектакльыште режиссёрын пашаже, артист-влакын рольым чон вошт колтен, мастарын модмышт, образыш келгын пурен моштымышт келшен. А Эрик Сапаев лӱмеш опер да балет академический театрын «Риголетто» оперыште Джильдан партийжым мурышо Алина Полевая чотак ӧрыктарыш. Тудын йӱкшӧ тӱнямбал кӱкшыт дене йоҥген, сандене актрисын ончыкылыкшо волгыдо лийшаш. Чаманаш кодеш, кызыт театрлаште моторлык, поэзий шӱлыш йомын толеш. А нине кок постановкылаште чылажат ситышын ыле. Тидым шке шинча денак ужаш, коваште дене шижаш йӧн лийын, – палемдыш жюри член Ольга Игорьевна.
Сеҥыше да Йыван Кырла лӱмеш театр премийым налше-влакым 27 мартыште, Тӱнямбал театр кечын, Э.Сапаев лӱмеш опер да балет академический театрыште саламленыт. Ты гана залыште тыглай ончаш толшо-влак огыл, а республикысе театр-влакын артистышт, режиссёрышт, икманаш, спектакльым сценыш лукмаште тыршыше-влак лийыныт. Пайрем дене нуным Марий Эл правительстве председательын икымше алмаштышыже Михаил Васютин саламлен да Марий Эл вуйлатыше Александр Евстифеевын саламлымашын серышыжым лудын пуэн.
Тӱвыра, савыктыш да калык паша шотышто министр Константин Ивановат пайремыш погынышо-влакым саламлен да театр-влакын икмыняр пашаеҥыштлан, артистыштлан правительствын, культур министерствын Чап грамотыштым, Таумутыштым кучыктен.
Сеҥыше-влакым тӱрлӧ номинацийыште палемденыт.
-
«Эн сай режиссур» — Василий Пектеев (М.Шкетан лӱмеш Марий национальный драме театр, «Окса тул»);
-
«Эн сай сценографий» — Борис Голодницкий (Г.Константинов лӱмеш руш драме академический театр, «Вечера на хуторе близ Диканьки»);
-
«Эпизодысо эн сай роль» – Светлана Сандакова (М.Шкетан лӱмеш Марий национальный драме театр, «Окса тул»);
-
«Оперыште эн сай партий»— (Э.Сапаев лӱмеш опер да балет академический театр, «Риголетто»);
-
«Балетыште эн сай партий» — Кристина Михайлова, Екатерина Байбаева (Э.Сапаев лӱмеш опер да балет академический театр, «Бахчисарайский фонтан»);
-
«Драме спектакльыште эн сай ӱдырамаш роль» — трио: Евгения Москаленко, Людмила Мансурова, Юлия Охотникова (Г.Константинов лӱмеш руш драме академический театр, «Бабье лето»);
-
«Драме спектакльыште эн сай пӧръеҥ роль» – Дмитрий Шишмаков (Г.Константинов лӱмеш руш драме академический театр, «Вечера на хуторе близ Диканьки»);
-
– Алексей Сандаков (М.Шкетан лӱмеш Марий национальный драме театр, «Окса тул»);
-
«Кокымшо планан эн сай пӧръеҥ роль» — Дмитрий Воронцов (Г.Константинов лӱмеш руш драме академический театр, «Вечера на хуторе близ Диканьки»);
-
– Артем Веденкин – (Э.Сапаев лӱмеш опер да балет академический театр, «Бахчисарайский фонтан»);
-
«Кокымшо планан эн сай ӱдырамаш роль» — Зинаида Долгова (Марий самырык театр, «Похождение Чичикова, или Мёртвые души»);
-
«Актёр-влакын дуэтышт» — Николай Марышев, Дмитрий Тораев, (Курыкмарий драме театр, «Мӹндӹр цӓшын сотыжӹ»);
-
«Дирижёр» – Григорий Архипов (Э.Сапаев лӱмеш опер да балет академический театр, «Бахчисарайский фонтан»);
-
«Ӱдырымашын пӱрымашыжым сайын почын пуышо» – Светлана Никитина, Татьяна Попова (Марий самырык театр, «Ӱмыр пелаш»);
-
«Зритель-влакын симпатийышт» приз — Екатерина Байбаева (Э.Сапаев лӱмеш опер да балет театр, «Бахчисарайский фонтан»);
-
«За честь и достоинство» – Светлана Сушкина (Э.Сапаев лӱмеш опер да балет театр);
-
«СТД председательын премийже» – Нина Пектеева Россий СТД-ын Марий Элысе пӧлкажын председательжын алмаштышыже);
-
«СТД-н «Усталык командировко» премийже» – Дмитрий Шишмаков (Г.Константинов лӱмеш руш драме академический театр);
-
«Директорын премийже» — Евгения Москаленко (Г.Константинов лӱмеш руш драме академический театр).
Сеҥыше-влакым саламлымеке, нунылан премийым пуымеке, эн сай спектакльлан фестивальын статуэткыжым кучыктымым чылан чон вургыж вучат. Но! Ты гана Гран-при дене нимогай пашам палемден огытыл.
– Тидыже фестивальыш тӱҥ призым сулышо чапле спектакльым лукмо огыл дене кылдалтын огыл, а мӧҥгешла, чыла паша жюрим ӧрыктарен, сандене иктым, эн сайым, ойырен налашышт йӧсӧ лийын, – палемден культур министр.
Теве уэш ик фестиваль эртен кайыш, премийым налше-влакат пале улыт. Ончыкыжымат театр коллектив-влаклан у да оҥай постановко дене шке ончышыштым, Марий кундемышкына толшо уна-влакым куандарат манын, ӱшаныме шуэш! Пашада тӱвыргӧ лектышан лийже!
А.БАЙКОВА
Е.Никифоровын фотожо
