«Рӱдӧ да Юл кундем Россеть Мариэнерго» филиалыште черетан Пашам аралыме кечыш управленийын да индеш РЭС-ын 600 утла технический службо пашаеҥышт ушнен.
Ты службын представительже-влакым чумырышо комиссий электроустановко дене пайдаланыме правилын йодмашыже энергообъектлаште кузе шукталт толмым терген. Тыгодым пашаеҥ-влаклан спецвургем ден йолчиемым, аралыше ӱзгар ден келыштарымашым кузе ситарымылан тӱткыш ойыралтын. Могай азап лийын кертме да тудын деч кузе аралалтме нерген ушештарыме. Тунемме полигоныш логалшашлан тергымашым эртыме.
Пашам аралыме кече кузе эртыме нерген актым ыштыме, тушто могай экшык палдырнымым да тудым кунам кораҥдышашым, тидлан кӧ мутым кучымым ончыктымо.
«Мариэнерго» пашаеҥ-влакын тазалыкыштым аралымылан да паша лӱдыкшыдымылан кугу тӱткышым ойыра. Пашам аралыме кече тиде гана производствышто эҥгек лийын кертмым шижтарыме дене кылдалтын. Пожар лӱдыкшӧ пагытлан ямдылалтме да тидын шотышто нормативым шуктымо йодышат тӱҥ семын ончалтын», – каласен «Рӱдӧ да Юл кундем Россеть» генеральный директорын алмаштышыже – «Мариэнерго» филиалын директоржо Сергей Хлусов.
Пашам аралыме кече «Мариэнергошто», «Рӱдӧ да Юл кундем Россетьын» моло филиалыштыже чӱчкыдынак эртаралтеш. Тудо план почеш але аварий амал дене олмыктымо нормым шуктымашке, пожар лӱдыкшыдымылыкым эскерымашке, производствышто арулыкым саемдымашке да экшыкым кораҥдымашке виктаралтын.
Ю.ИСАКОВ
