«Илыме вер да ола кумдык» национальный проектын «Оласе йырвелым йӧнаным ыштымаш» федеральный проектше дене келшышын, 2022 ийыште тӱзландараш палемдыме кумдыкым те, лудшына-влак, шке ойыраш тӱҥалыда. Возенна ыле, 12.gorodsreda. ru сайтыште онлайн-йӱклымашым эртараш единый платформым ыштыме. Тиде платформышто онлайн йӧн дене йӱклаш тыланда волонтёр-влак полшаш тӱҥалыт. «Марий Элыште лӱмын почмо сайт гоч 170 волонтёр регистрацийым эртен», – увертара республикын Чоҥымо паша, архитектур да илыме вер ден коммунал озанлык министерствын сайтше.
26 мартыште Марий Эл Республикысе молодёжь политике, спорт да туризм министерстве волонтёр штабын совещанийжым эртарен. Тушто Марий Элын Чоҥымо паша да ЖКХ министерствыже, Юстиций министерствыже, «Самырык-влакын полатышт», тыгак Йошкар-Ола, Волжск да Козьмодемьянск олаласе округла гыч еҥ-влак лийыныт. Совещанийыште районлаште волонтёр штаб-влакын пашаштым иктешленыт, онлайн-йӱклымашым эртараш волонтёр-влаклан кӱлеш вургемым да ӱзгарым ситарыме йодышым каҥашыме.
Кундемнан кум олаж гыч 170 волонтёр, икоян командыш ушнен, суапле пашам шукташ ямде.
Ушештарена, йӱклымаш 26 мартыште тӱҥалын.
Л.СЕМЕНОВА
Фотом марий Элын Чоҥымо паша,
архитектур да илыме вер ден
коммунал озанлык министерствын сайтше гыч налме
