28 мартыште М.Шкетан лӱмеш Марий национальный драме театрыште «Фейерверк талантов» IV фестиваль-конкурс эртен.
Тудын организаторжо – бальный куштымашым куштышо «Дебют» ансамбльым вуйлатыше Анна Соколова.
Конкурсыш Йошкар-Оласе, чыла гаяк районысо, тыгак Чуваш, Татарстан республикла гыч тӱрлӧ направлений дене куштышо-влак ушненыт.
Фестиваль кок йыжыҥ дене эртен. Икымшыште тазалык шотышто начар улшо да 50 ияш деч кугурак-влак, тыгак школышто тунемше да йочасадыш коштшо, но нимогай студийыште шуаралтдыме икшыве-шамыч мастарлыкым ончыктеныт, а кокымшо йыжыҥыште йоча сымыктыш, музыкальный, куштымаш школлаште шуаралтше, оласе культур полат пеленысе коллектив-влак сценыш лектыныт.
Куштымаш пайрем тазалыклан начар еҥ-влакын кумылыштым нӧлташ, нунынат моло дене тӧр улмышт нерген умылтарыме шот дене эртаралтеш. Участник-влакын мастарлыкыштым жюри аклен.
Фестивальын гран-прижым «Дебют» образцовый ансамбль ден Инвалид-влакын всероссийский обществышт дене пырля ямдылыме «Жизнь в танцах» инклюзивный проектышт, тыгак Чуваший гыч «Экситон» куштымаш да спорт клуб налыныт.
Конкурсышто Шернур район Марисола вел Купсола гыч йыгыр изак-шоляк Алексей, Илья, Никита Шабдаровмытат «Весела рвезе-влак» куштымашым ончыктеныт да икымше степенян лауреат лӱм дене палемдалтыныт.
А.БАЙКОВА
