Конкурс
«Калык врач» рашемын
«СОГАЗ-Мед» страховой медицине компаний» АО-н марий филиалже «Калык врач-2017» конкурсым иктешлен.
Тиде конкурсым компаний икмыняр ий почела эртара да эн сай врач-влакым пациент-шамычын полшымышт дене ойырен налын палемда.
Ты гана конкурс «Амбулаторно-поликлинический звенон эн сай врач-педиатрже», «Амбулаторно-поликлинический звенон эн сай врач-специалистше» да «Стационарын эн сай врач-специалистше» номинаций-влак дене эртен. Сеҥышыш пациент-влак деч эн шуко баллым погышо врач-шамыч лектыныт. Йӱклымаш 10 май гыч 9 июнь марте лийын.
16 июньышто конкурсышто сеҥыше-влакым «СОГАЗ-Мед» страховой медицине компаний» АО-н марий филиалжым вуйлатыше С.Попова диплом, пеледыш да шергакан пӧлек дене торжественно палемден.
Марий Элыште илыше калыкын шонымыж почеш, «Калык врач» конкурсын призан верже-влак тыге шеледалтыныт:
«Амбулаторно-поликлинический звенон эн сай врач-педиатрже» номинацийыште 1-ше верым Йошкар-Оласе 1-ше №-ан йоча поликлиникын педиатрический отделенийжын врач-педиатрже Анна Зверева налын, кокымшыш Йошкар-Оласе 3-шо №-ан йоча поликлиникын педиатрический отделенийжым вуйлатыше, врач-педиатр Валентина Липатникова лектын, кумшышто Йошкар-Оласе 3-шо №-ан йоча поликлиникын педиатрический отделенийжын врач-педиатрже Ольга Клепикова лийын.
«Амбулаторно-поликлинический звенон эн сай врач-специалистше» номинацийыште 1-ше верым Республикысе йоча клинический эмлымверын консультацийым пуымо поликлиникыштыже врач-йоча хирурглан пашам ыштыше Александр Григорьевлан пуымо, 2-шо верым – Йошкар-Оласе 1-ше №-ан йоча поликлиникын врач-гастроэнтерологшо Ирина Аржевитиналан, 3-шо верым – 1-ше №-ан йоча поликлиникын пеҥгыдемдыме эмлымаш (восстановительный лечений) отделенийжым вуйлатыше, врач-физиотерапевт Галина Анучиналан.
«Стационарын эн сай врач-специалистше» номинацийыште 1-ше верым Республикысе йоча клинический эмлымверын кардилогический отделенийжым вуйлатыше Люция Нуриева сеҥен налын, 2-шо верым – Республикысе йоча клинический эмлымверын 1-ше №-ан хирургический отделенийжым вуйлатыше Станислав Гживац, 3-шо верым – Республикысе йоча клинический эмлымверын функциональный диагностике отделенийжым вуйлатыше Марина Вилкова.
Конкурс – тиде таҥасымаш веле огыл, тыгак медицине пашаеҥ-влаклан тауштымо йӧн. Лач тыгаяк шӱлыш дене эртен тиде мероприятий.
М.ИВАНОВА.