СПОРТ

 Ечыгорныш – 36-шо гана

27 мартыште Волжский районысо Пӧтъял кыдалаш школ воктене Вера Кондратьева ден Ксения Кошаеван призышт верч 36-шо гана таҥасымаш эртен. Тудо ынде ты кундемыште йӱлаш пурен.

Ечыгорнышто вийым тергаш Волжск ола ден Морко район гычат спортсмен-влак ушненыт. Ийготым шотыш налын, участник-шамыч 3, 5, 10 километрым эртеныт.

Таҥасымашым эртараш полшымыштлан тале ечызе-влакын ешыштлан, тыгак трассым ямдылаш полшымыжлан В.Кондратьеван уныкаже Сергей Ивановлан таум каласат.

Шке тӱшкаштышт С.Яранцева, Р.Романов, Е.Козлова, И.Белкин, Д.Журавлёва, А.Васильев, К.Егорова, А.Тимофеев, Н.Соколов, Н.Жаркова, В.Никифоров, М.Ганиев, Т.Зайкова, Л.Павлова, И.Мухамедзянов, В.Романов икымше верыш лектыныт.

Эн самырык ечызе М.Степанова ден эн опытан спортсмен М.Шишкинлан, тыгак ойыртемалтше еш Малининмытлан посна шарнымашан пӧлекым кучыктеныт.

Сеҥыше ден призёр-влакым посна пӧлек да Чап кагаз дене палемденыт. Спонсор семын Кошаевмыт,  Ивановмыт ешым, Волжский район администрацийыште молодёжный политике паша шотышто Т.Головинам палемдыман.

Палашда: Ксения Кошаева (Андреева) ден Вера Кондратьева 1940 ийыште Москошто колхозник-влакын Икымше всесоюзный спартакиадыштышт республикнан чапшым араленыт. Ксения Андреевна икымше кечынак 2-шо верым сеҥен налын, а Вера Кондратьева – кумшым. Вес кечын Ксения кумшо вер дене палемдалтын. МАССР-ын командыже тунам Моско гыч кокымшо вер дене пӧртылын.

Ксения ден Вера коктынат Пӧтъял кундемыште иленыт.

А.Михайлов

 

Опубликовать в Одноклассники

Добавить комментарий