«Здравоохранений» национальный проектын «Онкологический чер дене кучедалмаш» национальный проектшым илышыш пуртымо кышкарыште Республиканский клинический больницын эндоскопический отделенийышкыже кок видеогастроскоп ден видеобронхоскопым шынденыт. Оборудований-влакын чумыр суммышт 8,8 млн. утла теҥгеш шуын.
Палемдыме оборудований-шамычын полшымышт дене вӱргорнын, капиллярын да тазыла чоран тыгыде структурыштым ужаш, эн изи вашталтышым вияҥаш тӱҥалме йыжыҥыштак рашемдаш лиеш. Технологийын клиникыже ракым верештме да тазыла чораште кокытеланымашым лукшо ужашым шымлыме шотышто поснак шергакан.
Тыгай шотан оборудований-влакын кӱлешлыкышт моткоч кугу. 2020 ийыште республикыштына онкологийын осал формыж дене черланыше-влак 5,1 процентлан шукемыныт. Утларак еҥ (38,3%) кочкышым шулыктарыме органын пуалмыж деч колен, 17,7 процент черле – шӱлымӧ корнын онкологийже деч. У видеоэндоскопический оборудований ракым вияҥаш тӱҥалме йыжыҥыштак рашемдаш да пациентым жапыштыже эмлаш тӱҥалаш сай йӧным ышта.
2021 ийыште «Онкологический чер дене кучедалмаш» проект кышкарыште республикысе кум медицине организацийыш – Республиканский клинический больницыш, Республиканский онкологический диспансерыш да Йошкар-Оласе эмлымверыш – 12 единице оборудованийым шындат, тидлан 88,3 млн. теҥгем кучылтыт. Оборудованийым налме деч посна 1091,6 млн. теҥгем стационарыште эмлалтше онкочерле-шамычлан медицине полышым пуаш ойырымо.
М.ИВАНОВА
