Школышто тунемше-влаклан всероссийский олимпиадын пытартыш этапшын икымше арняже эртен. Тушто Марий Элын чапшым 11 ӱдыр-рвезе арален.
Нуно экономике, химий, историй, руш, математике, физический культур, биологий, технологий, географий, руш, англичан да испан йылме-влак, предметла дене шинчымашым ончыктеныт.
Уш-акыл таҥасымашыш эн ончычак экономике, химий да историй дене участник-влак каеныт. Химий дене олимпиаде 20-28 мартыште Белгород олаште лийын. Ондак участник-влак шинчымашым теорий могырым тергеныт гын, вара эксперимент турым эртеныт. 28 мартыште олимпиаде дистанционный йӧн дене торжественно мучашлалтын. Лач тушто Марий Элын участникшын лӱмжӧ йоҥгалтын – У Торъял школын 11-ше классыштыже тунемше Григорий Ложкин призёр-влакын радамыш логалын! Чылаже 280 баллым погаш йӧн лийын гын, рвезе 164,25 баллым поген.
«Григорий химийлан 8-ше классыште тунеммыж годым поснак шӱмаҥын, – ойла У Торъял кыдалаш школышто химийым туныктышо, рвезын педагог-наставникше Лилия Глушкова. – «Уста йоча-влак. Химий» программе почеш тудо 2018 ий гыч шинчымашын налын, школ да район кӱкшытан олимпиадылаште сеҥышыш лектын. Григорийлан тыгак Руэм посёлкысо Уста йоча-влаклан рӱдерыште, кеҥежымсе лагерьыште, лияш йӧным ыштеныт. Рвезе, чынжымак, талантан да тыгодымак тыршыше. Тиде идалык куандара, вет ӱмаште пандемийлан кӧра Григорий олимпиадын пытартыш этапыштыже участвоватлен кертын огыл. Туге гынат тудо пел корнышто шогалын огыл, ончыко кая, тырша».
Ушештарена, школышто тунемше-влаклан всероссийский олимпиадын пытартыш этапыштыже сеҥыше да призёр-шамычын радамышкышт лекше-влак профилян предмет дене Российын кеч-могай вузышкыжо экзамен деч посна тунемаш пурен кертыт.Таҥасымаш элын 15 регионыштыжо чылаже 24 предмет дене 30 апрель марте эрта.
Г.КОЖЕВНИКОВА
