17-19 мартыште Пермьыште эртыше X всероссийский ялысе теле спорт модмаш гыч Марий Элын сборный командыже 1-ше вер (ялыште илыше 250 тӱжем наре еҥ илыман кундем-влакын подгруппыштышт) дене пӧртылын. Чыла, 42 команде коклаште, 6-шо верым налын.
Республикын чапшым У Торъял, Советский, Медведево, Кужэҥер районла гыч 17 спортсмен арален. Нуно программыш пурталтше чыла видыште вийым тергеныт. Лач ече дене куржталмаште таҥасен огытыл.
Участник-влак коклаште Марий Элысе спортсмен-влак еш командыште сай результатым ончыктеныт. Медведево район гыч Чулпан ден Алексей Зуевмыт Диана ӱдырышт дене 2-шо верым налыныт.
– Тыгай кӱкшытан ялысе теле модмаште ме икымше гана вийнам тергенна. Мыланна пеш келшен. Тӱҥ задачына – еш команде дене сай результатым ончыкташ. Тидым шуктенна манаш лиеш, но имньым кычкымаште изиш эркынрак тарванылынам. Лач тидлан кӧра 2-шо верыш лектынна. Икымше кечын ече дене куржталмаште пелашем дене коктынат 1-ше верым налынна гын, ӱдырна кокымшо лийын, а кокымшо кечын икшыве клюшко дене модын каен, капкашке голым пуртышаш да эстафетым аважлан пуышаш ыле. Ава вӱдвара дене вӱдым писын наҥгайышаш да эстафетым суртозалан пуышаш ыле. Имньым кычкаш ачам туныктен, но ты сомылым ямдылалтме деч посна изиш эркынрак шуктенам, – эртыше модмаш нерген каласкала Алексей Михайлович Зуев. – Туге гынат, тиде всероссийский теле модмашым илышышкына шкешотан ойыртемым пуртышо сай тат, поро шарнымашан ойыртем семын палемдыме шуэш. Такшым ме спорт дене кылдалтше да шӱмна дене эреак спортсмен улына, сандене сеҥаш тунемынна. Палена: тыгодым тӱрлыжланат ямде лийман. Россий кӱкшытан ялысе теле модмаште мыланна икте-весым ужын кутырымо, опыт дене пайлалтме шерге. Адакшым организаций пеш келшен. Мероприятийым торжественно почмаш моткоч оҥай лийын. Икманаш, чылажат изи олимпийский модмашым шарныктен.
Кє спортлан шӱман, таза илыш-йӱлам куча, шонымашке шумаште пеҥгыдылыкым, лӱддымылыкым да чын кучедалмашым акла, тыгай еҥлан ялысе теле модмаш – кугу пайрем, сай мероприятий. Тиде моткоч шижалтын, манын палемденыт участник-влак.
– Ожно ялыште пукшен-йӱктышӧ, ӱшанле эҥертышлан ушкал, а неле пашам ышташ полшышылан имне шотлалтыныт. Тидым мондымо огыл. Ушкалым лӱштымӧ аппаратым погышо-влак коклаште Советский район гыч Анастасия Артемьева ден Виктор Ельмекеев, механизатор-шамыч коклаште У Торъял район гыч мужыр пелаш Ольга Николаевна ден Александр Валентинович Новосёловмыт сайын выступатленыт. Полиатлонышто Медведево район гыч Ольга Смышляева, Андрей Яндыбаев, Семён Очеев ойыртемалтыныт. Тыгак шашке да шахмат дене модмаште Советский район гыч Ольга Васильева ден Анатолий Лебедевым, Любовь Микушова ден Эдуард Даниловым палемдыман. Зуевмыт деч посна Советский кундем гычак эше ик еш, Елизавета, Ольга, Александр Петуховмыт, сай результатым ончыктеныт. Икманаш, чылан молодец улыт, моткоч тыршеныт, – мокталтен каласыш командын вуйлатышыже Владислав Шабалин.
Иктешлыме семын тыге палемдыме шуэш: тачысе саманыште келшыше паша, пеҥгыде еш, физически да духовно вияҥаш йєн лиеш гын, волгыдо ончыкылыклан волгыдо ончыкылыклан ӱшан уло.
Палаш: Россий кӱкшытан ялысе теле спорт модмаш 20 ий эртаралтеш. Тушто ял ден селалаште илыше да тыршыше пашаеҥ-влак гына вийыштым тергат.
Е.ЭШКИНИНА
