КУЛЬТУР ДА ИСКУССТВО ТЕАТР

Марий Эл гыч «Маска» – кокымшо верыште

Юл кундем федерал округысо йоча да самырык театр коллектив-влакын «Театральный Приволжье» фестивальыште Марий Эл гыч «Маска» театр кокымшо вер дене палемдалтын.

Иктешлымаш 27 мартыште, Театрын тӱнямбал кечынже, онлайн режимыште эртен.

Ты коллектив «У войны не женское лицо» спектакльым ончыктен. Тыгак ты постановко Шарнымаш да чап идалыкыште сар темым тичмашын почын пуымыж дене посна номинацийыште палемдалтын.

А «Воштончыш» музыкально-драматический театр В.Якимовын пьесыж почеш шындыме «Кинда-Кунда» спектакльже дене шке ийготанышт-влак коклаште шымше верыш лектын.

Республикысе театр коллектив-влакым профессиональный пайремышт да фестивальыште сеҥымашке шумышт дене Марий Эл правительстве председательын икымше алмаштышыже Михаил Васютин саламлен.

Юл кундем федерал округысо йоча да студент-влакын эн сай театр коллективышт лӱмым налшаш верч 14 регион гыч 28 коллектив таҥасен. Проектыште 416 театр коллектив гыч чылажге 5 тӱжем наре самырык артист мастарлы кым ончыктен.

Йӱклымаш почеш, «Школ пеленысе эн сай театр коллектив» номинацийыште сеҥышыш Самара областьысе образцовый курчак театр лектын. А студент-влакын театр коллективышт кокла гыч жюри икымше верым Чебоксар гыч «Абрикосовый сад» театрлан пуэн.

Сеҥыше-влаклан у спектакльым шындаш грант пуалтеш: гран-прилан – 200, кокымшо верлан – 150, а кумшылан 100 тӱжем теҥгем.

Нуным апрельыште Ижевскыште саламлаш тӱҥалыт.

А.БАЙКОВА

Опубликовать в Одноклассники

Добавить комментарий