19 мартыште Йошкар-Оласе Калык-прикладной сымыктыш тоштерыште Поэзий кечылан да Шернур районын 100 ийжылан пӧлеклалтше «Кече семын илаш» сылнымут пайрем эртаралте. Тоштер вуйлатыше Татьяна Матвеева Тамшэҥер фольклор пӧрт пеленысе «Унавий» тӱрлымӧ студийын пашаж дене палымым ыштыш, уна-влак шернур вел вургемын тӱржӧ-влакым куанен ончышт.
Пайремыш толшо поэт-влак Геннадий Сабанцев-Ояр, Любовь Абукаева, Игорь Попов, Вера Гордеева пытартыш жапыште возымо почеламутыштым лудыч. Тиде кече писатель Валентин Исенековын шочмо кечыжлан тура тольо, сандене сылнымут мастар-влак «Борисыч чӱчӱштым» порын шарналтышт. Туныктымо пашан ветеранже Л.П.Смоленцеван каласкалымыжым колышташ оҥай ыле, тудо, шке манмыжла, «поэт огыл», но ӱмыржӧ мучко йоча-влакын шӱмышкышт сылнымут шӱлышым оптен. Сӱретче, балетмейстер, композитор, пьесе-влакын авторжо Николай Арбан нерген погымо материалжак мом шога! Меръеҥ, «Кеҥежымсе сылнымут» проектын авторжо, журналист Елена Иванова возымо паша корным ойырен налаш полшымыжлан Юлсер кундем гыч серызе Зоя Кудряшовалан тауштен ойлыш да шочмо Памашъялже нерген почеламутшым йоҥгалтарыш.
У лӱм денат палыме лийна, тиде рушла возышо автор, Шернур район Купсола гыч Нина Орлова. Тудо кок сборникым: «Ожидания – Вучымаш-влак» да «Чтобы звёзды не гасли» – луктын.
Костенеч деч посна могай пайрем? Поэзий кече лӱмеш сылнымут йокмалан Зоя Дудинан у книгажым шотлыман, чылажат лач тольо: Чебоксар гыч «Юмынӱдыр огеш пу вашмутым» книган сигнальный экземпляржым конден кучыктышт. Автор палдарыш:
– Книга ныл ужаш гыч шога: икымше ужашыш шочмо вершӧр, шочмо эл дене кылдалтше почеламут-влакым чумырымо; кокымшо ужаш «Мый Петрын олаште» маналтеш, тушко Санкт-Петербург олаште илымем годым возалтше почеламут-влак пурталтыныт; кумшо ужашыш кумалтыш мут-влакым погымо, а нылымше ужаш – Андрей Эшпайын «Песни горных и луговых мари» семжылан келыштарыме сылнымут сӱрет-влак. Марий калыкын мер илышыже негызеш возалтше почеламут-влакым мый сюжет линийыш пыштенам, театр постановко манашат лиеш. Тыште йӧратымаш, талешке, йылме нерген шонкалымаш-влакым иктеш ушенам, поэтике-публицистике да литературно-художественный манаш лиеш. Мо гынат, театрыште ончыкташ йӧршашлык. Поэзий негызеш шындыме действиян спектакльлан жап шуэш манын мый моткоч ӱшанем.
Поэт-влакын творчествыштым калык деке лишкырак намиен шуктымо тыгай йӧн уло. Поэтессын ойлымыж почеш, Санкт-Петербургышто, «Балтийский пӧртышто» Евтушенкон, Рождественскийын поэзийышт негызеш шындыме постановко-влакым тудо икмыняр гана куанен ончен.
Книган сӱретчыже – Сергей Таныгин. Тудын триптихше, полиграф-влакын тыршымыштлан кӧра, пеш сӧралын вераҥдалтын, тыге лудшо кок сымыктыш – поэзий да живопись – деке лишемеш.
Вашлиймаш моткоч тыматлын эртыш, чевер шошо кечын шокшыжо кажнын шӱм-чонжым вӱчкыш. Шижалтеш, поэт-влак икте-весыштым ужде сагынен илат, пырля чӱчкыдынрак вашлияш кутырен келшышт.
Л.СЕМЕНОВА
Н.Дудинан фотожо
