Оршанке район Тошто Крешын кундемыште лийме годым школыш пурышна. Директор Михаил Молотов мемнам порын вашлие да школ илыш дене палдарыш. Тиде жапыште школ пелен йоча лагерь пашам ыштен. Икшыве-влак тушто каненыт, тазалыкыштым пеҥгыдемденыт, модыныт.
— Тошто Крешын тӱҥ школышто 80 икшыве тунемеш. Коллективыште 20 туныктышо пашам ышта. Эртыше тунемме ийыште школ ден йочасадым пырля ушымо. Йочасадыш 30 икшыве коштеш. Ӱмаште икымше классыш 11 ӱдыр-рвезе толын гын, тений 12 тунемшым вучена, — мане вуйлатыше.
Михаил Ивановичым туныктышын изи пашадарже, ялысе школыш самырык туныктышын шагал толмыжо тургыжландара.
— Самырык-влакымат умылаш лиеш: илыме вер уке, пашадар изи, сандене ялысе школыш толаш кумылышт шагал. Но содыки куанжат уло: школыштына кок самырык туныктышо пашам ышта. Физкультурым Татьяна Виноградова, а англичан йылмым Татьяна Япаева туныктат, — палдарыш М.Молотов.
Школым ачалыме паша начар огыл кая. Район администраций кертмыж семын полша. Ончылий леведышым олмыктымо. Тидлан 80 тӱжем теҥгем ойыреныт. Тыгак вӱд пучымат вашталтеныт.
— Ме тунемшына-шамыч дене кугешнена. Теве тений кудымшо классыште тунемше Катя Виноградова почеламутым лудмо «Я познаю мир» районысо конкурсышто кокымшо верым налын. 1-ше классыште тунемше Андрей Пермяков ден 6-шо класс гыч Родион Емельянов тӱрлӧ конкурсышто, олимпиадыште сеҥымашышт дене куандарат, — каласыш Михаил Иванович.
Тошто Крешын школын выпускникше-шамыч ятырын ссузлашке тунемаш пурат. Поснак пытартыш ийлаште шукын Йошкар-Оласе строительный ден технологический колледжлаште тунемыт. Тыгак индешымше класс деч вара Оршанке район Кугунур ден Йошкар-Оласе 30-шо №-ан школыш 10-шо классыш тунемаш каят.
М.СКОБЕЛЕВ.
Авторын фотожо.
Снимкыште: Самырык туныктышо Татьяна Виноградова икшывын кумылжым предметшым йӧраташ савырен мошта.