Республикыштына «Мариэнерго» филиалын авалтыме кундемлаште илем ден социально кӱлешан объект-влаклан шошо вӱдшор жапыште электровийым ӱшанлын ситарымашке виктаралтше мероприятийлам шуктымо.
Энергокомпанийыште вӱдшор годым электролинийын, подстанций ден сооруженийлан пашаштышт вучыдымо азап лийын кертме лӱдыкшым иземдышашлан паша планым ямдылыме.
Тидын годым лум чот шулымо да эҥер ташлыме кундемлаште улшо оборудованийлан кугу тӱткышым ойырымо, дренаж устройство ден вӱд йоктарыме средствылам тергыме, пашаеҥ-влаклан тренировко ден инструктажым эртарыме.
Связь средстве ден увертарыме схемын кузе ыштымыштым терген, энергообъект кумдык ден сооруженийлам ончен лекме. Подстанцийла кӧргым, энергийым шеледен колтышо устройствыла деке корным, зданийла леведышым лум деч эрыктыме. Вӱд шарлыме годым эҥгекыш логал кертше социально кӱлешан объект-влаклан электровийым ситарышашлан кусаркалаш лийме шапаш источниклам вераҥдыме маршрутым рашемдыме.
Энергетик-влак эҥер гоч шуйналтше электролинийлам, ий тарваныме годым вӱдан верысе электромеҥгылам эреак тергат. Бригаде-влаклан кӱлешан ӱзгар ден вургемым ситарыме.
«Рӱдӧ да Юл кундем Россеть Мариэнерго» директорын сомылжым шуктышо Сергей Хлусов палемден: «Вӱдшор жаплан ответственный еҥ ден аварийный бригаде-влакын, спецтехникын кече еда дежуритлыме планым ямдылыме, Росгидромет ден МЧС подразделенийла, верысе кучем орган ден илаш йӧным ыштыше организацийла дене кылым рашемдыме. Аварий лийын кертме жаплан кӱлеш шапашым тӱрыс ситарыме».
Ю.ИСАКОВ
