Самырык мурызо Анита Феоктистова колыштшо-влакшым вашке у клип дене куандарен. Тудо «Кочо шарнымаш» маналтеш. Мурылан мутым ӱдыр шкеак возен, семым Олег Славин келыштарен.
Сюжет тыгай: ийготыш шудымо ӱдыр ик мурызым йӧрата. Тудын деке лишкырак лияш шонен, кумиржын студийыштыже шке мурыжым возаш шонен пышта.
«Тиде нылымше клипем. Тудо студийыште возалтын. Икымше диплом почеш артист-режиссёр улам, садлан сценарий-влакым шкеак возем. Режиссёржат, тӱҥ геройжат мыяк улам.
Йолташем-влакын чоным почмышт, иктажым ужын коштмем ушеш возеш. Тыге почеламут, клиплан сюжет-влак «шочыт», – каласыш Анита.
О.МОШКИНА