УВЕР ЙОГЫН

«Оптышыш» ынышт логал манын

Мошенник-шамычын еҥ-влакым тӱрлӧ семын ондалкалаш тӧчымышт нерген чӱчкыдынак ойлалтеш гынат, нунын «опкышышкышт» логалше-шамыч садак алят моткоч шукын вашлиялтыт.

Тыгай туткар шагалрак лийже манын, «Осторожно, мошенники!» оперативно-профилактический мероприятий-влак дене келшышын, мутлан, Морко районысо полицийын участковый уполномоченныйже-шамыч предприятий ден организацийлаште пашам ыштыше-влак дене вашлиймашлам эртарат, палдара Марий Элысе МВД-н пресс-службыжо.

Тыгай вашлиймашлан тӱҥ шонымашыже – мошенник-шамычын еҥ-влакым утларакше могай йӧн дене ондалкалаш тӧчымышт дене палдарымаш.

Пытартыш жапыште полиций пашаеҥ-шамыч еҥ-влак дене тидын нерген кажне кечын мутланат да листовкымат пуэдат.

Каласкалымаштышт поснак кугу тӱткышым мошенник-шамычын телефон дене кузе ондалкалаш тӧчымыштлан ойырат. Нуно шижтарат: банк гыч пуйто иктаж пашаеҥ йыҥгырта да могай-гынат нелылык лекме нерген ойла гын, телефоным вигак йӧрташ да, банкыш шкан пӱтыралын, мо лиймым рашемдаш темлат.

Тыгак полицейский-шамыч тидын нерген лишыл еҥыштлан, поснак кугурак ийготан-шамычлан, ойлаш да шижтараш йодыт.

Л.КАМАЛЕТДИНОВА

Опубликовать в Одноклассники

Добавить комментарий