Эше кок политический партий Марий Эл Республик вуйлатышын должностьышкыжо шке кандидатшым темлен, палдара республикын Рӱдӧ сайлымаш комиссийже.
«Российская партия пенсионеров за социальную справедливость» политический партийын региональный отделенийжын тӱшка погынымаштыже тудын председательже Валентина Злобинам кандидатлан темлаш решенийым луктыныт.
«Зеленые» экологический партийын региональный отделенийже кандидатлан лукташ Николай Семеновым темлен.
Тыге тачысе кечылан куд еҥ республик вуйлатышын должностьышкыжо сайлымашке ушнаш кумылым ончыктен. Нылытын Марий Элын Рӱдӧ сайлымаш комиссийышкыже кӱлеш документым тылеч ончычак пуэныт – тиде аким республик вуйлатышын пашажым жаплан шуктышо Александр Евстифеев, ЛДПР-ын Марий региональный отделенийжын координаторжо Альберт Фёдоров, Марий Элыште «Справедливая Россия» партийын региональный отделенийжын советшын председательже Наталия Глущенко да «Гражданская платформа» политический партийын региональный политический комитетшын секретарьже Андрей Смышляев.
Л.Камалетдинова.
