Марий Элыште 20 тӱжем утла еҥ у коронавирус инфекций деч прививкым ыштыктен.
Тидын нерген тазалыкым аралыме министр Марина Панькова регионым вуйлатыше Александр Евстифеевлан правительствын заседанийыштыже увертарен.
Таче кечылан вакцинацийым 18 ий деч кугурак кажне еҥ эртен кертеш. Прививкым ыштыкташлан мӧҥгӧ гыч лекде возалташ лиеш: илыме верысе поликлиникыште, «шокшо линийын» телефонжо дене да Кугыжаныш да муниципальный услуго-влак единый портал гоч. Тыгодым пациент прививкым ыштыкташ келшыше кече ден жапым ойырен налын сеҥа. Мӧҥгӧ гыч возалташ йӧн уке гын, тидым шуко функциян рӱдер гоч специалист-шамычын полшымышт дене ышташ лиеш.
Заседанийыште палемдыме почеш, регионыштына вакцинацийым эртыме деч вара пациентын тазалыкше начаремме случайым регистрироватлыме огыл.
«Прививкым ыштыктыше-влак кокла гыч 48,2 процент ужаш еҥже 60 ий деч кугурак-шамыч улыт. Гам-КОВИД-Вак вакцинын могай тӱшка еҥын тазалыкшылан зияным ыштен кертмыжым инструкцийыштыже ончыктымо, тидым медицине пашаеҥ-шамыч шотыш налыт», – палемден М.Панькова.
19 март йотке республикышкына Гам-КОВИД-Вак вакцинын 21792 дозыжым кондымо. Тылзе мучаш марте эше 10300 дозо толшаш.
Марий Элыште у коронавирус инфекций деч прививкым 19 медицине тӧнеж ышта. Вакциным аралаш келшыше кылмыктыме да йӱкшыктарыме оборудованийым ситышын налме. Медперсоналымат туныктымо. Палемдыме медорганизацийлаште вакцинацийым эртарыме 110 пункт пашам ышта, куснылшо 52 бригаде тырша. Тылеч посна организацийлаште куснылшо 50 пунктым почмо. Вакцинацийым эртарыме нерген чыла увер келшыше регистрыш пурталтеш.
Марий Эл Республикым вуйлатышын организаций да
аналитике виктемжын уверже негызеш
М.ИВАНОВА ямдылен
