Йошкар-Ола гыч лекмеке, Шернур кугорно дене кудалме годым Данилово ял мучаште, Савино селашке савырнымаште пурла велне, ик кугу кевыт верланен. Тиде корно дене кӧлан каяшыже логалын гын, тудым кажныже ужын. Мыят тӱжем гана ужынам дыр, товатат. Но тудын шеҥгелныже тыгай чапле каныме вер уло манын паленат омыл! Очыни, шукышт семын…
«Ик гана ужат гын, ӱмыреш шарнет…»
Тиде верже ола воктенысе «Венеций» комплекс («Загородный комплекс «Венеция») маналтеш. Тудо Данилово ял, 198А адрес дене верланен. 8 Март пайрем огыл гын, тыгай комплекс улмо нерген меат ятырынже палыдеак лийына ыле докан. Йӧра, Ӱдырамаш кече вашеш «Марий Эл» газетнан коллективше дене тушко каналташ миен толаш темлышт!
Паледа, тушто могай мотор?! Тиде – комплекс, сандене кугу кумдыкымак айла. Мемнан мийымына годым эше лум киен да шуко сӧраллыкше тудын йымалне петыралтын ыле гынат, садак каныме верыште чылажымат шонен ыштыме палдырнен да шижалтын.
Капка гоч эртетат, пурла велне кумда-а вер почылтеш. Тыште кеҥежым иктаж пайремым эртарыме годым кушташ, модаш моткочак йӧнан. Туштак каналтен шинчаш кугу террасе верланен. Чыла тидым ужын, очыни, кажнына шоналтен: «Эх, молан кеҥежым толын огынал?!» Вет тунамже тыште эшеат сӧрал! Ойлымем пеҥгыдемдаш манын, комплексын интернетыште улшо икмыняр сайтышкыже пурен, фотографий-влакым ончен лектым да статьяште кучылташ, тыланда, лудшына-влак, ончыкташ кумылем лекте. Ынде шкеат ужыда: кеҥежым тыште моткочак мотор!
Но мыланна шошымат тушто чотак келшыш! Вет капкашке пурымеке, кудывече дене эртымеке, шола велне кок пачашан кугу оралте верланен. Тушто икымше пачашыштыже кок монча уло. Кокымшыжо могайрак – каласен ом керт. А мылам гын мемнан айлымат келшыш. Тушто, сауна сынан мончаште, ялт ялыште улмыла чучо! Выньык дене кыраш йӧратыше-влак, а ме тыгай ӱдыр-шамычше шагалын огынал ыле, ну, вет кырышна! Икмыняр гана! А вара, шӱалталтын, выньык лышташым мушкын колтен, бассейныш куржынна! Ну, йӧра, писын ошкылынна. Молан писын? Тудыжо уремыште верланен! Бассейным парник семын келыштарыме! Коллектив дене ме ынде кушто да могай саунышто, каныме верыште лийын огынал, но тыгайым але ужын огынал ыле! Чыла вере гаяк бассейн – сауно кӧргыштак. А тыште, монча гыч лектын, луман йолгорно дене иктаж 3-4 метрым эртыман, вара веле тушко логалат! А тушкыжо пуретат, паледа, чоным могай куан шижмаш авалта?! Вет уремыште
юалге, а тушто – леве-леве! Тый тыгаяк леве вӱдыштӧ ийын коштат, а окна вес велне йырым-йыр лум ошын койын кия. Паледа, пуйто телым кеҥежыште улат! Санденак ме, ӱдыр-шамыч, бассейнышкыже савырныме еда манме гаяк куржтална. Да туштыжо ласкан гына ийын коштна мо?! Вӱдыштӧ тӱрлӧ упражненийым ыштылна, эсогыл мурышна! Куштенат ыле докан – бассейнже келгырак ыле да йолна пундаш марте ыш шу…
Йӧн лектеш гын, теат тушко миен толашак тыршыза. Огыда ӧкынӧ, товатат! Мӧҥгешла, кумылда моткочак нӧлталтеш да ты верыште лиймыдам эше кужу жап шарнен илаш тӱҥалыда! Мемнан семынак.
Палдарымаш
Палдарыме семын каласаш гын, ола воктенысе «Венеций» комплексыште монча, бассейн дене пырля эше 120 еҥлан келыштарыме кугу банкетный зал, 35 еҥлан келыштарыме изи зал улыт. Тыштак шашлыкым шке кӱкташ але ямдым налаш, моло сийым, мутлан лагманым, казаныште ыштыме пловым, роллым, ракым тамлаш лиеш. Тыште лӱмгечым, сӱаным, тӱрлӧ пайремым эртараш моткочак йӧнан.
Каналтыме, мончаш пурымо деч вара кӧн тышанак кодмыжо шуэш гын, тидымат шотыш налме, вет тиде комплексыште 2 еҥлан келыштарыме пырня гыч ыштыме 6 изирак уна пӧрт (гостевой домик) уло. Тушкыжо пурен да мо улмым шке шинчам дене ужын омыл, сандене аклен каласен ом керт. Но сайтлаштышт возымо почеш, кажне номерыште кондиционер, телевизор уло. Тыгодым кажне номерын акше тӱрлӧ манын каласыме.
Икманаш, ола воктенысе «Венеций» комплексыште сайын каналташ чыла йӧным ыштыме. Оксадам веле ида чамане…
(Рекламе шотеш)
Фотом интернет гыч налме
Любовь КАМАЛЕТДИНОВА
