Ончыгече, 24 февральыште, Нижний Новгород оласе Нижегородский районный суд Марий Элын ончычсо вуйлатышыже Леонид Маркеловым поснак кугу взяткым налмыжлан, должностной полномочийже дене утыждене пайдаланымыжлан да оружийым закон дене келшыдымын аралымыжлан титаканлан шотлен да 13 ийлан эрык деч посна кодаш пунчалым луктын, палдара ТАСС.
Возенна ыле: прокурор Леонид Маркеловым 17 ийлан пеҥгыде режиман колонийыш колташ, 235 миллион утла теҥге штрафым тӱлыкташ да кум ий жапыште вуйлатыше должностьышто пашам ышташ права деч посна кодаш темлен.
Кодшо кечылаште пале лийын: суд эрык деч посна кодышаш жапым 4 ийлан иземден да 13 ийым палемден. Пунчал дене келшышын, республикын ончычсо вуйлатышыже пеҥгыде режиман колонийыште шинчаш тӱҥалеш. Четлык коклашке петырымылан тений апрельыште 4 ий лиеш. Тиде жап палемдыме срок гыч кораҥдалтеш, сандене Леонид Маркеловлан шуркалыше кӱртньывоштыр коклаште шинчашыже 9 ий утларак веле кодеш. Тыгак тудлан 235 миллионат 280 тӱжем теҥге штрафым тӱлыктат.
Палдарыме семын ойлаш гын, приговорын кугытшо 400 утла лаштык погынен. Тиде амал дене тудым суд арня лудын.
«Регион 12» телекомпанийын ончычсо генеральный директоржо Наталия Кожановам суд 8 ийлан, Марий Элын ончычсо ялозанлык министрже Ираида Долгушевам 3 ият 6 тылзылан эрык деч посна кодаш пунчалым луктын.
«Акашевская» сурткайык фабрикын директоржо Николай Криваш гын следствий деч алят тугак шылын ила.
Л.КАМАЛЕТЛИНОВА
