СОЦИАЛЬНЫЙ ИЛЫШ

Волгенче перен

19 июньышто Йошкар-Оласе Тыныслык уремын 91-ше пӧртшӧ воктене волгенче ӱдырым перен. Азапыш логалшым вашкеполыш бригаде ММЗ-н эмлымверышкыже конден. Тыгаяк туткарыш кӱдырчан йӱр годым телефон дене мутланыше пенсионер ӱдырамаш логалын.     

Кӱдырчан йӱр, тале мардеж лийшашым МЧС пытартыш жапыште СМС-увер йӧн дене шижтара. Тидын шотышто кидым лупшалман огыл. Кӱдырчан йӱр годым чара вер гыч шылаш тыршыман. Волгенче тӱҥ шотышто эн кӱкшӧ точкым пера. Кӱртньӧ арвер дечат утлаш уто огыл, молан манаш гын волгенчын кӱсеныште кийыше сравоч кылдышыш логалме случайже уло. Икманаш, кидшагат, шинчыр, сравоч, эсогыл калай але кӱртньӧ ужашан зонт волгенчылан пераш амалым ыштен кертыт.

Волгенче перыме годым айдеме шокышто лиеш: кушто улмыжым ок умыло, суткан жапшым ок пале. Вуйжо савырна, мутланымыж годым чаракым шижеш. Тыгай годым айдеме шӱлаш «монда» да ушым йомдара, тидлан кӧра коленат кертеш. Азапыш логалше айдемылан жапыштыже полшаш кӱлеш.

М.ИВАНОВА.  

Опубликовать в Одноклассники

Добавить комментарий