УВЕР ЙОГЫН

Чаманена, самырык йолташ-влак…

11 февральыште Йошкар-Ола-Зеленодольск кугорнышто лийше аварийыште марий блогер Олег Давыдовын да тудын йӧратыме ӱдыржӧ Лилия Ильинан ӱмырышт кӱрылтын.
Татарстан Республик Мамадыш район Шия ялыште шочын-кушшо самырык рвезын вӱдымӧ «Марий-влакумылат» Instagram лаштыкше марий блог-влак коклаште ик эн кугулан шотлалтеш. Арня ончыч тушто 24,5 тӱжем еҥ ыле гын, таче кечылан тиде чот 25,2 тӱжем марте кушкын.
Шучко аварий кечын самырык рвезе блогшым йолташыже, «Марий Сем Москва» лаштыкым вӱдышӧ Юлия Смуглаялан ӱшанен улмаш.
– Чылажат пеш вучыдымын лийын кайыш – алят ӱшанымыла огеш чуч. Пытартыш жапыште ме Олег дене серышым ваш чӱчкыдын возгаленна. Блог-влак нергенат ятыр мутланенна. «Марий-влакумылат» лаштыкым изи йочамлан шотлем манын палдарен ыле. Тазалыкше изиш начареммылан кӧра пароль ден логинжым мылам пуэн. Жаплан вӱдаш темлен. Тиде йолташемын пытартыш йодмашыже лийын улмаш…, – чоным почо Юля.
«Марий Эл» газетын коллективше самырык мужырын ӱмыр лугыч лиймыжлан родо-тукымжылан кугу чаманымашым каласа.
(Фотом Олег Давыдовын лаштыкше гыч налме)

Опубликовать в Одноклассники

Добавить комментарий