Российыште вӱдышылан шотлалтше кок медицине рӱдерын кардиологшо ден гинекологшо-влак у коронавирус инфекцийын пандемийже пагытыште шӱм да ӱдырамаш черан пациент-влаклан полышым пуат.
Нацийын тазалыкше лигын поро кумыл фондшо ден «Нацийын тазалыкше лиге» общероссийский мер организаций Россий Минздравын А.Н.Бакулев лӱмеш шӱм-вӱргорно хирургийын рӱдерже да В.И.Кулаков лӱмеш акушерствын, гинекологийын да перинатологийын рӱдерышт дене пырля Президент грант-влак фондын полшымыж дене «Тазалык пыл» («Облако здоровья») проектым илышыш пуртат.
Проектын тӱҥ шонымашыже хронический черан пациент-шамычлан дистанционный телемедицине, чотак кӱлмӧ годым адресный стационар полышым пуымо дене кылдалтын. Тудын кышкарыштыже специалист-влак стационарыште да мӧҥгыштӧ (амбулаторно) эмлалтше пациент-шамычлан консультацийым яра эртарат.
Полышым налашлан пациент-влаклан «Тазалык пыл» телемедицине сервисыште https://telemed.oblakozdorovia.ru/ адрес дене регистрироватлалтман але авторизоватлалтман да йодмашым колтыман. Тушто кӱлшӧ медицине рӱдерым ойырен налман да «Услугым налаш» кнопкым темдалман. Умбакыже йодмашын инструкцийжым шуктыман. Данный-влакым обработатлыме деч вара пациент врачын онлайн-консультацийышкыже ӱжмашым налеш.
Консультацийлан микрофонан да веб-камеран компьютер але Chrome браузеран мобильный телефон кӱлыт. Кажне устройствын видеолан секундышто 2 Мб, аудиолан секундышто 512 кб деч изи огыл писылыкан Интернет дене кылже лийшаш. Тыгак медицине документым сканироватлен але фотографироватлен ямдылыман.
Специалист-влакын полышыштлан Рӱдӧ, Юл кундем да Йӱдвел Кавказ федеральный округлаште илыше-влак эҥертен кертыт.
М.ИВАНОВА
