Ончычсо паша радамышкышт пӧртылыт

Марий Элыште у коронавирус инфекций дене черланыме чотын иземын толмыжо палдырна.
3 февральыште Марий Элым вуйлатыше Александр Евстифеев РФ Кугыжаныш советын у коронавирус инфекций шарлыме ваштареш шогымо шотышто пашаче группыжын черетан заседанийыштыже участвоватлен.
Видеоконференцкыл йӧн дене эртыше заседанийыште таче кечылан ик эн кӱлешанлан шотлалтше йодыш-влакым лончылымо.
«Тичмаш налмаште элыштына ковид шотышто чыла тӱҥ показательын иземын толмыжым ужына. Январьыште каникул деч вара поснак шуко еҥын черланен кертмыж шотышто лӱдмына ыш пеҥгыдемдалт. Кызытсе ситуацийым сай семын аклаш лиеш, элыштына ковидный манме койкылаште эмлалтше-шамычын чотышт чырыклан иземын. Но чумыр показатель эше кугу», — манын пашаче группым вуйлатыше С.Собянин.
Роспотребнадзорын Марий Элысе виктемжын пытартыш уверже почеш, Марий Элыште COVID-19 дене черланыше-влакын чотышт иземын толеш. Мутлан, 3 февральлан налмаште республикыштына у коронавирус инфекций дене чумыржо 10793 еҥ черланен, пытартыш суткаште – 43. Медицине велым коронавирусан черле дене кылым кучышо 1253 еҥым эскерат. Палемдыме показатель-влак арняште 1,09 пачаш иземыныт.
COVID-19 дене черланымым регистрироватлыме пагытыште эн шуко еҥ Йошкар-Олаште (50,86%), Медведево районышто (9,86%) да Волжскышто (8,58%) инфицироватлалтын. Черланыше-шамыч коклаште утларакше пенсионер (37,5%), пашазе (25,2%), медик (10%) да служащий-влак (8%) улыт.
COVID-19 дене кылдалтше эпидситуацийын саемын толмыжлан кӧра 26 январь гыч Оршанке районысо рӱдӧ больницыште 130 койкым да Йоча республиканский клинический эмлымверыште 40 койкым профильышт дене пашам ышташ пӧртылтымӧ. 1 февраль гыч Йошкар-Оласе больницыште у коронавирус инфекций дене черланыше пациент-шамычлан медицине полышым пуымо койко чотым 20 единицылан иземдыме, Волжск оласе рӱдӧ эмлымверыште 110 койкым ончычсо паша радамышкыже пӧртылтымӧ, Марий Турек районысо В.В.Свинин лӱмеш рӱдӧ больницыште – 60 койкым, Звенигово районысо рӱдӧ эмлымверыште – 70 койкым, Козьмодемьянск район-влак кокласе больницыште – 15 койкым да Медведево районысо рӱдӧ эмлымверыште – 77 койкым. Тыгеракын, таче кечылан COVID-19 дене черланыше пациент-влаклан республикысе 9 медицине организацийыште 925 койко пашам ышта.
Регионын Тазалыкым аралыме министерствыжын палдарымыж гыч, пытартыш кум арняште стационарлашке эмлалташ пыштыме пациент-влакын чотышт 52 процентлан иземын.
Коронавирусын пандемийже пагытыште Марий Элысе Гигиене да эпидемиологий рӱдер ден СПИД да инфекциян моло чер дене кучедалме, нунын дене черланыме деч профилактикым эртарыме республиканский рӱдерыште 291 807 шымлымашым эртарыме.
2 февраль марте регионышкына у коронавирус инфекций деч профилактикым эртарашлан Гам-КОВИД-Вак вакцинын 16692 дозыжым кондымо. Тымарте прививкым 2360 еҥ ыштыктен, 713 пациент вакцинацийын тичмаш курсшым эртен.