Йошкар-Оласе у аэровокзал комплекслан чапланыше землякна-влак кокла гыч кӧн лӱмжым пуэда ыле? Кызыт кандидат-влакым темлымашке Марий Элыште веле огыл илыше кажне еҥ ушнен кертеш.
Кандидат-влакын лӱмыштым 21 февраль марте Марий Эл Правительствын, Мер палатын да Транспорт да корно озанлык министерствыжын ВКонтакте соцкылысе группылаштыже кодаш лиеш. Организатор-влакын шонымышт почеш, темлыме еҥын кундемнам чапландарымаште надырже але авиаций дене кылдалтше суапше лийшаш. Списке ямде лиймеке, тушеч эн чӱчкыдын ушештаралтше 3-5 еҥым ойырен налыт, а вара нунын кокла гыч иктым онлайн йӱклымаш гоч палемдат. Финал йӱклымашым шошо мучаште эртарат. Российын кечыже вашеш ты лӱм пале лийшаш. Ойырен налме лӱмым Йошкар-Оласе аэропортлан пуымо шотышто республикын Мер палатыже варажым йодмаш дене РФ Мер палатыш лектеш.
«Марий Эл» газет редакцийнат кандидат-влакым чумырымо пашаш ушнен. Йӱклымашым соцкылысе лаштыкшыте эртарена. Кӧм вара мемнан лудшына-влак темлат, ончалына. Кызытеш эн шукын поэт да актёр Йыван Кырлан лӱмжӧ верч йӱкленыт. Вара — композитор Андрей Эшпай да марий сылнымутын классикше С.Г.Чавайнын лӱмышт верч.
Тӱрлӧ сайтыште эше икмыняр лӱмым темленыт. Южыжым палемдымак шуэш:
Игорь Антропов:
— Йӱклымашке темлыме лӱмлӧ еҥ-влак чыланат пагалымашым суленыт гынат, аэропортлан Звенигово районысо Красногорский посёлкышто шочын-кушшо летчик, Российын Геройжо Владимир Ильич Шарпатовын лӱмжым пуыман. ИЛ-76 самолётын командирже Афганстанысе Кандагарыште лийын. 378 кече пленыште лиймеке, утлен кертын. Геройын подвигше огыл мо? А ме тудын нерген сайынже огынат пале….
Людмила Егорова:
— Мыят аэропортлан авиаций дене кылдалтше еҥын лӱмжым пуыман манын шонем.
Эдуард Ураков:
— Марий патыр Онарын лӱмжӧ сайын йоҥга «on air».
Вера Горохова:
— Марий кундемын икымше лётчикше, Морко кундемыште шочын-кушшо Анатолий Степанович Кудряшовын лӱмжым пуыман.
Ирина Малинина:
— Марий Эл гыч икымше лётчик Анатолий Степанович Кудряшовын лӱмжӧ тидлан келшен толеш. Тудо шке илышыжым авиацийлан пӧлеклен. Каваште 200 тӱжем наре шагатым каваште эртарен. Икымше классан пилот. «Аэрофлотын отличникше» знак дене палемдалтын. Марий АССР транспортын сулло пашаеҥже.
Сергей Мамаев:
— Мый ты спискыш Марий кундемнан шочшыжо-влакым, Икымше да кокымшо тӱнямбал сар-влакын геройыштым (чыланат летчик лийыныт) темлем: Николай Кокорин, Михаил Кологривов, Андрей Вершинин, Михаил Зарецких, Николай Васильев.
Николай Аракчеев:
— С.Г.Чавайнын лӱмжӧ тидлан ик эн чот келшыше. Шке калыкшым чот йӧратымыжлан кӧра тудым казнитленыт. Тудым пагаленыт, тудын деч лӱдыныт…
Екатерина Васенева:
Марий Турек посёлкышто шочын-кушшо икымше марий академик, Совет Ушем кӱкшытыштӧ чапым налше Василий Петрович Мосоловын лӱмжым пуаш темлем…
Клавдия Тарасова, Параньга район:
— Олор ял гыч Харитон Алексеевич Романов ятыр ий тӱнямал авиалинийлаште чоҥештылын. Сулен налме канышыш лектын. Ик кече эртымеке, тудым угыч пашаш лекташ йодыныт. Пытартыш гана Москва – Дакар-Фритаун маршрут дене чоҥештылын. 70 моряк присягым приниматлымаш деч вара самолётышто лийын. Каваш нӧлталт шуктенат огыл, юж судно мландыш 8 метр келгытыш керылт камвозын. Правительственный комиссий ышталтын. Газетшымат ужынам. Тиде 1980-1985 ийлаште лийын. Мый лач тудын лӱмжым аэропортлан пуаш лиеш ыле манын шонем.
С.Носова ямдылен.
