1 февраль гыч Интернетысе социальный сеть-влак нунын дене пайдаланыше-шамычын тушко вераҥдыме аватмутым кучылтман материалыштым блокироватлышаш улыт. Тидын шотышто кодшо ийысе декабрь мучаште «Увер, увер технологий да уверым аралыме нерген» федеральный законыш вашталтыш пурталтын.

Законлан тореш кайыше постлан наркотикым ямдылыме да кучылтмо нерген увер, йоча порнографий, шкем шке пушташ, тӱшкан беспорядкым ышташ ӱжмаш, обшествым, кугыжанышым пагалыдымаш дене кылдалтше увер-влак шотлалтыт.

Постым блокироватлыме нерген пунчалым соцсеть, чарыме материалым вераҥдымым рашемдымеке, сутка жапыште лукшаш. А ӱчашымаш лектеш гын, сеть дене пайдаланыше Роспотребназзорыш йодмаш дене лектын кертеш.  

Законлан тореш кайыше увер жапыштыже ок кораҥдалт гын, пайдаланышыланат, интернет — ресурс-влакланат изи огыл штрафым тӱлаш пуэн кертыт. Тудын кугытшо физический лицалан 200 тӱжем теҥге марте, должностной лицалан 800 тӱжем теҥге марте да юридический лицалан 8 миллион теҥге марте лийын кертеш. Уэш штрафым тӱлаш палемдат гын, тудо эшеат кугурак лиеш.

 С.Носова