Россий МЧС-н Марий Элысе Тӱҥ управленийыштыже пытартыш жапыште ойыртемалтше утарыше-влакым палемденыт.
Нунын коклаште Козьмодемьянскысе утарыше отрядын пашаеҥже-влак Олег Федоров ден Юрий Куприяшкин лийыныт. 2019 ийыште шыжым Юл эҥерыште колызо-влак туткарыш логалыныт, йымалнышт ий катлен да нунын шогымо ужашыже вӱд почеш форватер велке каен. Утарыше-влак мотор пуш дене тарваненыт. Но пушыжым вӱд марте ий моклака-влак гоч шупшын пурташ кӱлын. Эшежым колызо-влак деке миен шумаште угыч шуко ий падыраш ийын коштын. Нунымат шкаланыштак пуш кольмо дене кырен, шӱкен толашашышт логалын. Колызо-влакын шогымо ийыш куснымеке, саде ийже тодылалтын. Но утарыше-влак йӧным муын, колызо-влаклан утарыше жилет-влакым кудалтен да нуным иктын-иктын пушыш луктын кертыныт. Мастарлыкыштлан да лӱдымылыкыштлан кора гына ты операций сайын мучашлалтын. Республикысе Тӱҥ управлений вуйлатышын алмаштышыже Николай Шатунов нунылан Россий МЧС-ын «За спасение погибающих на водах» медальжым кучыктен.
Тыгак ты ведомствынак «За заслуги» медаль дене Марий аварийно- утарыше службын Рӱдӧ аварийно-утарыше отрядын пашаеҥже Алексей Загайнов палемдалтын. Икмыняр ойыртемалтше утарышылан «XXX лет МЧС России» медальым кучыктеныт.
С.Носова
