КУЛЬТУР ДА ИСКУССТВО НОВОСТИ ПӰСӦ ЙОДЫШ Чолгалык ЯЛ ИЛЫШ

Чылдемырыште – у тӱсым налше книгагудо

27 январьыште Шернур район Чылдемыр ялысе книгагудо уэмдыме пӧртыш илаш пурымо пайремым палемден.

Тушко пагалыме уна, книгам лудшо да ялыште илыше-влак моткоч шукын погыненыт. Ынде библиотеке шке йолташыже-влакым волгыдо да у тӱсым налше залыште вашлийын кертеш. Ялысе книгагудым капитально олмыктымо пашам верысе «Земледелец» ял озанлык артель шуктен. Светлана Клепикован моштен да тыршен вуйлатымыж почеш пашаеҥ-влак 5 ноябрь гыч 30 декабрь марте эр гыч кас марте лым лийде тыршеныт.

Оралте негызын шӱйшӧ пырняже-влакым алмаштен, керамзит блокым оптымо, кӱвар каштам, авагаштам вашталтыме, кӱварым, тувырашым уым шарыме. Тиддеч посна книгагудым кӧргӧ гычат, тӱжвал могыржымат жаплан келшыше материал дене комыжлымо, – палемдыш Светлана Сергеевна.– Леведышымат пӱтынек уым ыштыме.

Уэмдыме библиотекым почмо дене Шернур муниципальный район вуйлатыше Сергей Адиганов, администрацийыште культур пӧлка вуйлатыше Алёна Ямбулатова, Шернурысо Ким Васин лӱмеш рӱдӧ библиотеке системын директоржо Ирина Кошкина, Чылдемыр ял шотан илем вуйлатыше Дмитрий Кужнуров саламленыт, ятыр поро шомакым каласеныт да пӧлекым кучыктеныт.

Чылдемыр библиотеке толшаш ийын 50 ияш лӱмгечыжым палемдаш тӱҥалеш. Тиде жапыште тушто кок вуйлатыше лийын. Зоя Николаевна Иванова книгагудышто 38 ий ыштен, сандене пайрем жапыште тудак книгагудын историйже дене палдарен. Тудын деч вара Раисия Сергеевна Богдановалан тиде пашам ӱшаненыт да кызытат тудым моштен шукта.

Тошто оралтым йомакысе гай пӧртыш савырымыштлан чылалан, поснак «Земледелец» ял озанлык артельын пашаеҥже-влаклан, кугу таум каласем. Ял калыкынат ик ой дене, келшен пашам ыштымыже, поро шӱлыш дене полшымыжо сайынак шижалте, – чонжым почо библиотеке вуйлатыше.

А.БАЙКОВА

Е.Тетеринан фотожо.

 

Опубликовать в Одноклассники

Добавить комментарий