Марий Элым вуйлатыше Александр Евстифеев у коронавирус инфекций деч палемдалтше вакциным кондыштарыме да аралыме оборудованийым налашлан республикын Тазалыкым аралыме министерствыжлан 6 млн. 900 тӱжем теҥгем ойырен.
У коронавирус инфекций деч прививкым ыштыше медицине организаций-влаклан 43 фармхолодильникым, кылмыктыше 18 камерым да 44 термоконтейнерым налаш палемдыме. Тылеч посна, рефрижераторан кок «ГАЗель» автомобильым кондат. Оборудований вакциным кондыштарыме годым температур режимым эскераш да прививкым ыштыме пунктым организоватлаш йӧным ышта. Тидын дене прививке кампанийым писынрак эртарен колташ да регионыштына у коронавирус инфекций дене черланыме чотым иземдаш полша.
Ушештарена: вакцинацийым республикысе 19 медицине организаций эртара. 26 январь марте 2200 еҥлан прививкым ыштыме. Февраль мучаш йотке регионышкына вакцинын эше 26 тӱжем наре дозыжым кондат. Идалык мучаш марте Марий Элыште илыше чумыр калык гыч 60 процент ужашыжлан прививкым ыштен шукташ палемдыме.
Марий Элым вуйлатышын организаций да
аналитике виктемын уверже негызеш
М.ИВАНОВА ямдылен
