ЙОШКАР-ОЛА

Йошкар-Ола аэропортлан лӱмым ойырена

Кодшо кечылаште республикысе Мер палатым вуйлатыше Герман Дементьев журналист-влакым брифингыш чумырен. Мутланымаш Йошкар-Оласе у аэровокзал комплексым чоҥаш тӱҥалме да тудлан чапланыше землякнан лӱмжым пуымо йодыш дене кылдалтын ыле. А кӧн лӱмжым пуаш – тидым Марий Элыште илыше калык шке ойырышаш.

Эн ончыч кандидат-влакын спискыштым ямдылат. Тушко пуртышашлык еҥ-влакын лӱмыштым кажныже темлен кертеш. Тӱҥжо – темлыме еҥ кундемнам чапландарымаште надырже але авиаций дене кылдалтше суапше лийшаш. Темлымаш-влакым 21 февраль марте Марий Эл Правительствын, Мер палатын да Транспорт да корно озанлык министерствыжын В Контакте соцкылысе группылаштыже  кодаш лиеш. 

Кандидат-влакын спискышт ямде лиймеке, тушеч эн чӱчкыдын ушештаралтше 3-5 еҥым ойырен налыт, а вара нунын кокла гыч иктым онлайн йуклымаш гоч палемдат. Финал йӱклымаш шошо мучаште эртышаш. Российын кечыже вашеш ты лӱм пале лийшаш. Ойырен налме лӱмым Йошкар-Оласе аэропортлан пуымо шотышто республикын Мер  палатыже йодмаш дене РФ Мер палатыш лектеш.

Каласен кодыман, мемнан элысе аэропорт-влаклан ты але вес чапланыше исторический личность-влакын лӱмыштым 2019 ийыште пуэныт. Нуным тыгак тӱшка калыкыште каҥашеныт да йӱклен ойыреныт. Вара Россий Президент ты шотышто посна указым луктын. Тачысе кечылан 47 аэропорт иктаж-кӧн да  лӱмжым нумалеш, мутлан, Москосо Шереметьево аэропорт писатель А.Пушкинын, Домодедовысо – учёный М.Ломоносовын, Нижний Новгородысо – летчик-испытатель В.Чкаловын, Озаҥысе – поэт Г.Тукайын, Чебоксарысе — комонавт А.Николаевын. А кӧн лӱмжым марий аэропортлан пуат – ме шке ойыраш тӱҥалына.

Мутлан, кызытеш Мамич Бердейын, Иван Петровын, Йыван Кырлан, Яков ден Андрей Эшпаймытын лӱмыштым темлыше-влак улыт.

С.Носова

 

Опубликовать в Одноклассники

Добавить комментарий