«Аваят, мыят куанен лудына», — манеш Йошкар-Оласе йочасадыште воспитательлан тыршыше А.Сергеева. Тудо газет редакцийын эртарыме лотерей дене тӱҥ призым модын налше Шернур район Чылдемыр ял гыч А.Милютинан ӱдыржӧ.
«Марий Эл» газет подписчикше-влак коклаште идалыклан кок гана лотерейым эртара. Редакцийыш квитанцийым пыштыман ятыр серыш пура. Нунын коклаште Шернур район Чылдемыр ял гыч Анна Васильевна Милютинанат письмаже лийын.
— Авай самырыкше годсекак шочмо йылме дене лекше тӱҥ марла газетым лудаш йӧрата да ондак «Марий коммунылан», вара «Марий Эллан» подпискым эре ышта, — каласкала редакцийыш призым налаш толшо А.Сергеева. – Мемнам, икшывыже-влакым, газетлан шӱмаҥден да тудым кызытат куанен лудына. Мый шкеже Марий пединститутышто тунемынам да йочасадыште тыршаш тӱҥалынам. Телым кок арнялан ик гана, а кеҥежым гын арня еда шочмо ялыш кудалыштына. Ончычшо ача ден ава ятыр вольыкым кученыт, ынде казашт уло. Тудланат кургым ямдылаш кӱлеш. Мийымеке, газетымат кидыш налам. Мыланем эше «Сурт-пече» газет моткоч келша. Тазалыкым кузе пеҥгыдемдаш, кочкаш шолташ туныктат, тыгак моло материалымат лудам.
Анна Васильевна ӱмыржӧ мучко колхозышто тыршен, сӧснам, вара презым ончен. Пелашыже, Яков Никифорович, тыгак колхозышто пашам ыштен, техникым виктарен. Шукертсек сулен налме канышыште улыт.
— Авамлан лотерей дене пӧлек ончычшат логалын, шампурым модын налын ыле, — ойла А.Сергеева. – Пеш куанен. Мемнан дене кеч пӱртӱс газ дене пайдаланат, кочкышым писын шолтышо «Чудесница» каструль сурт кӧргыштӧ эре кӱлеш лиеш. А мый газет редакций коллективлан тыге каласем: тау пӧлеклан, лудшыда, подписчикда-влак ешаралтышт, оҥай материал-шамыч шукырак лийышт. А лудшо-влаклан тыланымашем тыгай: шочмо марий йылмым ида мондо, икшывыда-шамычым тудлан шӱмаҥдыза, туныктыза, марий газетым налаш ида мондо. Кызыт, ялыш миетат, икшыве-влак шукышт рушла веле мутланат. Тыгайым колатат, чонлан лапкан чучеш. Ача-аван мутланыме шочмо йылмышт нимо деч шерге!
В.СМОЛЕНЦЕВ
М.Скобелевын фотожо
