САМЫРЫК ТУКЫМ

Проездной билет – сай полыш

Шукерте огыл пандемий жапыште шке кумылын поро пашаш ушнышо лу волонтёрлан Йошкар-Оласе троллейбусышто яра кудалышташ проездной билетым кучыктеныт.  

«Регион да Россий кӱкшытыштӧ эртаралтше мероприятийлаште полышкалыше семын кокымшо ий тыршем. #МыВместе акцийыш майыштак ушненам. Волонтёр-влаклан тӱҥ шотышто кочкышым да эмым налына. Ик гана телефоным ачалаш наҥгаяш йодыныт ыле. Олмыктышо, волонтёр улмынам да кӧн телефонжо пален налмеке, йӧршын вес сай телефоным пуэн колтен. Эмгудышкат миен толаш йодыт. Тидыжлан ончыч поликлиник гыч рецептым налман.

 Поро пашам ышташ неле огыл. Еҥлан полшет – вий ешаралтеш да умбакыжат тыршаш кумыл лектеш. Коча-кова-влакын тау мутышт чоным ырыкта.

Йодмаш-влак оласе тӱрлӧ микрорайон гыч пурат. Шукыж годым сурт да тунемме тӧнеж дек чак верланыше адрес-влакым ойырен налам ыле. Икмыняр гана торашкат кошташ логалын, но тидлан шуко жап кӱлын. Волонтёр-влаклан проездной билетым кучыктымым пеш сай шонымашлан шотлем. Тиде мемнан пашанам икмыняр пачаш куштылемда да эше шукырак еҥлан полшаш йӧным пуа», – каласыш ик проездной билетын озаже Екатерина Новоселова.

О.МОШКИНА

Опубликовать в Одноклассники

Добавить комментарий