САМЫРЫК ТУКЫМ

Автобус вучымо «ушан» вер

Тачысе лаштыкын унаже – Советский район Вечын села гыч мастар ӱдыр Екатерина Юркина. Тудо Юл кундем кугыжаныш технологий университетыште Чоҥымаш  да архитектур институтышто архитекторлан тунемеш. Школ годсек тӱрлӧ проект-влакым воза. Иктыже «Ушан остановко» маналтеш.

– Ты проектын тӱҥ шонымашыже могай?

Ялла пеленсе шуко остановко мотор тӱжвал сыныштым йомдареныт, кокланде лавырат, рӱдаҥшат койыт. Нунылан у шӱлышым пуаш уто огыл. Тыге автобусым вучен шогышо йоча-влаклан шинчымашым шарналташ але уым пален налаш пайдале лийже манын, остановкылаш школ программе гыч правил-влакым сӱретленна. Мутлан, Удельный ялысе остановко англичан йылмылан пӧлеклалтын. Математикым, руш йылмым шарналташ полшышо вер-влакат улыт.

– «Ушан остановко» тӱҥалтышым кушеч налын?

2018 ийыште уло класс дене Советский посёлкышто эртыше «Йоча форсайт» форумыш миенна ыле. Тушто ме, кум йолташ Алина Моковеева, Артём Кукарев да мый проектым шоненна да эксперт-влак ончыко аклаш луктынна. Нуныжо «Неле лиеш, но ыштен ончыза», ­– манын вашештеныт.

        – Кузе шонет, тиде проектын ончыкылыкшо уло?

       – Икымше курсышто тунеммем годым тиде пашам «Доброволец России» конкурсышко колтенам ыле. Чаманен каласаш логалеш, Россий кӱкшытыш эртен огыл. Пырля тунемше ӱдыр-рвезе-влак, «Ушан остановко» нерген пален налмеке, полшаш кумылаҥыныт. Шошо-кеҥежым проектым умбакыже шуена.

         Тушто тыгак правил-влак лийыт. Лач Вечын селасе ик остановкышко марий кундемын моторлыкшым ончыктышо сӱретым сӱретлена.

          Яллаште автобус вучымо тоштемше вер-влакым калык шке олмыкта гын, пеш сай ыле.

         – Ыштыме годым могай нелылык лектын?

        – Кагазеш, мутат уке, сӱретлаш куштылго, а остановко тиде – кугу сооружений. Йыр улшо пӱртӱсым, сурт-влакымат шотыш налман. Утыж дене ойыртемалтше лиеш гын, сайжак огыл. Шкурко дене эрыкташ, рӱдаҥшым кораҥдаш, чиялташ шуко вий да жап кӱлыт.

          Кумылым волтышо сӱретат палдырна. Остановкым ыштымеке, ик ий гыч тушто тӱрлӧ оккӱлым возымым ужынна. Кузе тидым чараш, ом пале. Йӧра кеч команде гыч ик ӱдыр аваж дене коктын ты возымым «шылтеныт».

        Кеч-кунамат ала-мо уым, моторым да кӱлешаным кужу жаплан арален кодаш тыршыман. Вет тиде верысе калыкынат, унанат кумылжым вӱчка.

          ­– Тиде пашам ышташ кумыл да вий гына шагал. Ӱзгарым налаш шийвундат кӱлеш. Тыланда полышым иктаж-кӧ пуа?

        – Ончыч верысе администрацийыш миенна ыле, тушто корно озанлык организацийыш эҥерташ темленыт. Тыгак ыштенна. Нуно мыланна чиям ойырышт. Тидыже проектнан икымше ошкылжым ышташ полшен.

     Шкерте огыл йоча да ийготыш шудымо-влаклан «Эр вий»  ушем пашанам умбакыже илышыш шыҥдараш вич тӱжем теҥгем кучыктен. Ӱшанымыштлан да тыгай полышым пумыштлан кугу тау.

Катя, шонымашет сай лектышыш шуаш полшыжо.

– Тау!

О.МОШКИНА мутланен

Опубликовать в Одноклассники

Добавить комментарий