ИЛЫШ ЙЫЖЫҤ

Шоячылан тыгак кӱлеш…

Тӱҥалтышыже 2020 ийысе 48, 2021 ийысе 1-ше №-ан «Сурт-пече» газетыште

Шоячылан тыгак кӱлеш…

... Ик кеҥеж кастене ӧрдыж ялысе пасушто вараш кодмешкак кучалтым. Санаторий гыч канен толшо ватыжым вашлийшаш шофёрем жап деч ончыч колтышым. Тусо ялын бригадир шке транспортшо дене конден кодынеже ыле, ай, мӱндыржак огыл, корно сай, эҥер сер дене эркын мӧҥгӧ йолын ошкедем, манын, тореш лийым.

Тыге ял велыш ошкедем, а туп шеҥгечем тылзе корнем туге яндарын волгалтара, километр наре ончыко чыла раш коеш… Кас тымык. Кенета колам, кутыркалыме йӱк эре рашемеш да лишемеш. Шогалынак колыштым: коктын кутырат. Кӧ улмышт арама вондо кокла гыч сайын ок кой, но йӱкышт моткоч палыме. Ончем – Люба ден Василий. Кычкыралнемат ыле, но самырык-влаклан мом мешайкалаш манын, шкемым шым палдаре. Колам, кукшо да кӱрышталтше йӱк дене Василий вожылшын кутыра:

– Тый дечет посна омак керт… марлан от лек гын, олаш лектын кудалам…

– Олашкыже мом кычал кайынет, але вара ялыште тынар неле илаш? Армий деч ончыч уло районлан лӱмет йоҥген манын кутырат ӱдыр-влак.

– Эх, Любаша, нимом тый ынет умыло, чоныштем тыйым нигӧ алмаштен ок керт… Молан мылам уло районлан палыме лияшыже кӱлеш, очыни, садланжат тый ӱмбакем йӱштын ончет…

– Ну, чылт йӱштынжак манаш ок лий, шижмашем огеш лий ыле гын, ялеш кодаш сӧрвалаш ом тӱҥал ыле. Чыла ныл могырышкат каен кертат манам ыле…

– Шижмашет уло гын, молан вара мылам марлан ынет лек?

Тылеч вара нуно кужун шып шогышт. Ала кудыжын арама укшым тодыштмыжо шоктыш. Вара Люба кутыраш тӱҥале:

– Умылет, Василий, сай рвезе улметлан кӧрак йӧршынат койышланен ондалкален, тыйым окмаклан ужмем ок шу. Моткоч тыматле койышан улат, ужат, теве ӱдыр-шамыч кузе почешет куржталыт, кастене уремыште ласкан шинчашет эрыкым огыт пу, шкешт пижедылыт. Кеч кудыжым таче нал, нигӧат тылат марлан лекташ тореш ок лий. Мыят тыйым ом йӧрате манын ом керт, йӧратем, но тольык ӱдыр семын огыл, а изам гай. Тый кеч-кунамат арален налат, полыш кидым шуялтыше поро чонан рвезе улат, ӱчызӧ отыл.

– Шӱжар семын манат, – Василий пич йӱкшӧ дене ӱдырлан ойлен пытараш ыш пу, – иза-ака семын икте весым пагалаш да салам шомак ден серлаген, вашлийын эртен ошкедаш темлет?

– Да, шӱжар семын, – Люба почешыжак пелештыш.

Ты жапыште нуно арама кокла гыч корно тӱрыш лектын шогальыч. Ужам, Василий йолаш кӱсен гыч йылгыжше портсигарым лукто, тамакым пижыктыш. Ылыжше шырпе рвезын шинчавӱдан чурийжым «ужален» волгалтара…

Леве свежа йӱд мардеж араман кӱшыл укшлажым ниялткален эртыш.

– Каена, йӱштӧ… – вачыжым куптыртен, Люба рвезым мӧҥгӧ ӱжӧ.

Ик мутым пелештыде, Василий ӱмбачынже пинчакшым кудашын, ӱдырын вачышкыже пыштынеже да ӧндалнеже ыле, но Люба рвезын кидшым кучен шогалтыш.

– Огеш кӱл, каена, ошкылмаште коктынат ырена.

– Раш, мылам чыла раш… – сӱмсырын пелештыш Василий, – тугеже гын ялыш шумеш ужатыше деч поснат корным муат манын шонем. Мылам – вес могырыш, вачыжым нӧлталын, рвезе пинчакшым тӧрлатыш да, мыйым шекланен шуктыде, воктечем эҥер велкыла писын ошкыл колтыш. Люба икмыняр минут шогышат, шеҥгекыже ончалде, ял велкыла корно дене вашкыде тарваныш. Каваште ийше пыл лапчыкын волгыдо тылзым петырымешкыже, ӱдырын ош тувыран шкет ӱмылкаже мӱндырчынат раш койо. Вара эркын-эркын ӱдырын тупшо йомо.

Р.ЧЕПАКОВА ямдылен

Опубликовать в Одноклассники

Добавить комментарий