Тачысе лаштыкнан унаже – Медведево кундемын чолга да мотор ӱдыржӧ Анна ТАНЫГИНА. Тудо кызыт Казаньыште ила да тунемеш.
— Анна, тый кушташат, мурашат кертат. Тидлан тыйым кӧ шӱмаҥден?
— Авам ден ачамат чоҥышо улыт. Туге гынат лач нуно мыйым мураш, кушташ кумылаҥденыт. Тыгак Национальный президент школышто тунемме пӱртӱсын пуымо мастарлыкем шуарен. Тау тусо туныктышо-шамычлан. Вара И.Палантай лӱмеш тӱвыра да сымыктыш колледжыш тунемаш пуренам. Ынде Казаньысе консерваторийыште нылымше курсышто тунемам. Уста пианист лияш шонем.
— Шукерте огыл Казаньыште ӱстембал теннис дене эртыше фестиваль-спартакиадыште сеҥышыш лектынат. Тугеже спорт денат пеҥгыде кылым кучет?
— Спорт тазалыклан пайдале, сандене капкылым шуараш жапым муаш эре тыршем. А ӱстембал теннис дене колледжыште тунеммем годым модаш тӱҥалынам. Ончыч перемене годым гына, а вара занятий деч варат коштынам. Кызыт таҥасымашке лекме мартеат кушкын шуынам. Ӱшаныме гаят ток чуч,чонлан келшыше сомыл сеҥымашке конден. Мый тыгак бильярд, волейбол дене модам. Бильярд дене ӱмаште вуз кӧргысӧ таҥасымаште икымше верым, а Татарстанысе вуз-влак коклаште кид турам тергымаште кумшо верым налынам.
— Тӱрлӧ конкурсышто усталыкет ончыктет, ансамбльыш коштат… Кузе чыла вере шуктет?
— Самырык годым вӱр шолеш, чыла вере шуаш тыршет. Тыгак лийшаш, вет шкем тӱрлӧ пашаште терген ончыман. А конкурсышто усталыкым ончыктымо шуаралташ полша. Теве Татарстанысе Менделеевск район Элнет ялыште эртыше Семыкыште «Марий ӱдыр» конкурслан ямдылалтме годымкочкышым ямдылен моштымо мастарлыкем шуаренам. Кас мучко когыльым кӱэштынам, корнышто кудалмем годым шке нергенем почеламутым возенам. Тыгак «Лай мардеж» фольклор ансамбльыште мурем, куштем. Консерваторийыште икымше курсышто тунеммем годым Эстонийыш, финно-угор фестивальыш, миенна. Мастарлыкна эстон калыкым пеш ӧрыктарен. Но эн тӱҥжӧ — ансамбльыш коштмо тӱрлӧ кундемым ончен кошташ йӧным пуа.
— Элнетыште тый сеҥышыш лектынат, а теве Йошкар-Олаште эртыше Пеледыш пайремыште «Марий ӱдыр» конкурсышто призер коклашкат логалын отыл. Кумылет волен огыл?
— Марий Элыште лийше конкурсышто усталыкым ончыкташ мыйым ик кече ончыч гына ӱжыныт, садлан тудлан ямдылалташ жап ситен огыл. Сеҥыше але призер лийын омыл гынат, кумылем нимыняр волен огыл, вет ме калыклан куаным конденна. Тидыже нимо деч шерге.
— Тачысе самырык тукым моштымашыжым форумлаште, слётлаште ончыкта…
— Мыят ятыр форумыш миенам. Шарнаш кодшыжо — Татарстаныште эртыше Студент-влакын образовательный форумышт. Тушто шым площадке пашам ыштен. Мый предпринимательстве площадкыште лийынам, тушто мемнам лӱмлӧ педагог-влак туныктеныт. Нунын ойлымышт мыланем илышыште ончык ошкылым ышташ кугу шӱкалтышым пуэн. Ӱмаште Оршанке район Кугу Ӧрша школышто эртыше Марий самырык тукымын слетыштыжо лийынам. Тушто палыме лийме йолташем-шамыч дене тачат кылым кучем, тыгак слетышто проектым возаш да тудым илышыш шыҥдараш тунемынам.
— Кызыт ӱдыр-рвезе-влак школыштак шочмо йылмышт дене огыт мутлане. Тыйын шонымаште, самырык-влакым шке йылме дене кутыраш кузе кумылаҥдаш лиеш?
— Марий йылмем моткоч йӧратем. Мӧҥгыштӧ ача-авам, акам, изам-шамыч дене эре марла мутланена. Шочмо йылмем деч нигунам вожылын омыл, корныштат коштмо годым марла кутырем. Теве Казаньыште автобусышто кудалмем годым ик татар ӱдырамаш авам дене телефон гоч мутланымем колышт каен. Варажым тыге мане: «Мылам шукертак лекташ кӱлеш ыле, но тыйын ныжыл, мотор йылме дене кутырымет моткоч келшен». Тидын деч вара шочмо йылмем эше чотрак йӧраташ тӱҥалынам, сандене шке йылмышт дене мутланаш вожылшо-влакым ом умыло.
А марий йылме дене самырык-шамыч утларак кутырышт манын, школышто ты предметым обязательный семын пуртыман, а марий икшыве тудым кугыжаныш йылме семын огыл, а шочмо йылме семын тунемшаш.
Лидия ШАБДАРОВА.
Д.Речкинын фотожо.
