УВЕР ЙОГЫН

Чаманена, порын шарнена

У ий тӱҥалтыште марий калыкын пагалыме еҥже, республикнан экономикыштыже пале кышам кодышо уста вуйлатыше

Евгений Сергеевич ПЕТРОВЫН

ӱмыржӧ кӱрылтӧ. Тудо улыжат 65 ийыш тошкалын ыле.

Морко район Унчо ялын эргыжым мер пашаште чулымлыкым ончыктымыжлан кӧра Марий кугыжаныш университетын физике-математике факультетшым тунем пытарыме деч вара вигак комсомол горкомыш налыныт. А тушечын Йошкар-Оласе кинде комбинатыш комсомол секретарьлан колтеныт. Ик ий пашам ыштымеке, 3-шо №-ан кинде заводын директоржылан шогалаш темленыт. Тиде вуйлатыме пашаште тудо 1983 ий октябрь гыч 1997 ий июнь марте лийын. Ак шотышто кӱшыч шуктымо йоҥылыш политикылан кӧра предприятийын нелылыкыш логалмекыже, полшымо олмеш у кучем велым ишыктымым гына шижын, да тушеч шке кумылын каяшыже логалын. Кум ий утларак жапыште предприятий шым вуйлатышым вашталтен шуктен, тудым петырашт шоненыт. Но кертын огытыл да 2000 ийыште угыч Евгений Сергеевичым ӱжыктеныт. Нелылыкыш логалше предприятий тудын вуйлатымыж почеш ик ий жапыште кугу ошкылым ыштен… Но кучемыште лийше у вашталтыш угыч чаракыш савырнен да «Марий кинде» заводым йӧршын петырымашке шуктен.

Оласе кугурак предпритяийым вуйлатыше иктаж марий еҥым паледа? Кодынат огытыл вет… Но Евгений Сергеевич йӧршынжак чакнен огыл, вуйдеҥге гыч чайым ыштыше «Яндар» фирмым почын да эркын-эркын производствым кугемден толын. А вуйлатыме пашам эргыжлан ӱшанен, шкеже ойым пуэн шогышыжо лийын. Ты фирмым кызыт Российыште веле огыл, вес эллаштат палат.

Чаманен каласаш логалеш, тудым негызлыше да ойым пуэн шогышо уста вуйлатышын ӱмыржӧ кӱрылтӧ. Но тӱҥал кодымо пашаже ок кӱрылт, умбакыже вияҥаш тӱҥалеш, шонена. Евгений Сергеевич нерген поро шарнымаш тудын поро пашажлак чоныштына илаш тӱҥалеш. «Кийыме верет пушкыдо лийже!» — ойлена ме тудым пагалыше-влак лӱм дене.

«Марий Эл» газетын пашаче ешыже

Опубликовать в Одноклассники

Добавить комментарий