Марий Эл Республик Правительстве председательын ончычсо икымше алмаштышыже, ялозанлык да продовольствий министр
Александр Яковлевич
Егошин
илыш гыч каен. Тудлан 72 ий темеш ыле.
Александр Яковлевичын чумыр илышыже республикнан агропромышленный комплексше дене кылдалтын. 1968 ийыште Марий ялозанлык техникумын агрономий отделенийжым тунем пытарыме деч вара У Торъял районысо «Прогресс» колхозышто агрономлан ышташ тӱҥалын. Варажым тиде озанлыкым 20 ий утла вуйлатен. 1976 ийыште Озаҥ оласе М.Горький лӱмеш ялозанлык институтын «Агрономий» отделенийыштыже шинчымашым нӧлтен, 1991 ийыште ялозанлык науко кандидат лӱмым арален. Тудо тыгак У Торъял район администрацийым вуйлатен. 2001 ий гыч 14 ий утла республик правительстве председательын икымше алмаштышыжлан, ялозанлык да продовольствий министрлан ыштен.
Пашам шуко ий да тыршен ыштымыжлан икмыняр орден да медаль дене палемдалтын, республикнан кугыжаныш премийжын лауреатше лийын, «Россий Федераций ялозанлыкын заслуженный пашаеҥже» чап лӱмым нумалын.
Александр Яковлевич моткоч поро шӱман, шке калыкше, пашаеҥже-влак, шочмо кундемже верч эреак тыршыше лийын. Пашалан кӧра жапше шыгыр лийын гынат, шке мӧҥгысӧ озанлыкыштыже тыршашат йӧным муын. Ятыр жап тӱкан шолдыра вольыкым, сурткайыкым ончен, илышыжын пытартыш кечылаж марте мӱкшым ашнен. Тидын нерген «Марий Эл» газетат шке жапыштыже кумдан возен ыле. Ме А.Я.Егошинын ешыжлан, родо-тукымжылан, лишыл палымыже-влаклан чаманымашнам каласена да тыге манына: Александр Яковлевич, кийыме мландет пушкыдо лийже, ме Тендам эре шарнаш тӱҥалына.
«Марий Эл» газетын пашаче коллективше
