УВЕР ЙОГЫН

«Куржталза мемнан дене пырля, таза лийза!»

«Куржталза мемнан дене пырля, таза лийза!» – манеш «Марий Эл радион» тӱҥ редакторжо В.Матвеев.

Тений ты марий радиолан – 15 ий. Шкешотан юбилейым палемдыме семын тушто тыршыше-влак тӱрлӧ проектыш, акцийыш ушненыт. Тӱшкан погынымо кугу мероприятий эртаралтын огыл гынат, тӱрлӧ йӧным кучылташак тыршеныт. Мутлан, кеҥежым Патриарший площадьыште «Почмо студийым эртареныт. Эше иктыже – таза илыш-йӱлам кучымо амал дене куржталмаш.

Тушко радио пашаеҥ-влак деч посна Марий Эл Республикын икымше марий президентше В.Зотин (1991 ий декабрь – 1997 ий январь), Марий Элыште Олимпийский советын президентше, ончычсо спорт министр В.Чумаков, спорт мастер-влак ушненыт. Эсогыл еш денат лӱмынак тазалык корныш лектыныт. «Кажне лӱмлӧ спортсмен лийын огеш керт, а физкультур дене таҥлалташ чыла йӧн уло, ӧрканаш гына ок кӱл. Уш-акыл денат, капкыл денат таза лийман, санден яндар южыш лекташ, тарванылаш, кеч тыглай ошкылын эрташ шкан жапым чаманыман огыл, – маныт Замковмыт да Кирилловмыт еш-влак.

Мутат уке, Марий Эл Радиом яллаштат, олалаштат шукын куанен колыштыт. Радио гоч шуко еҥ, тӱрлӧ увер дене палыме лиеш, пайдале да кӱлешан каҥашым налеш. Калыклан шочмо йылме дене лекше передаче, увер-влак оҥай лийышт манын, радиожурналист-влак чот тыршат. Нуно колыштшо-влак денат пеҥгыде кылым кучат, вашлиймашке ӱжыт.

Тек ончыкшым радио дене поро, куандарыше увер-влак йоҥгат, а тушто тыршыше да чыла калык таза лийыт.

Е.ЭШКИНИНА

Авторын фотожо

Опубликовать в Одноклассники

Добавить комментарий