«Тӱвыраште – у» фестивальын пытартыш кечынже Т.Евсеев лӱмеш национальный тоштерын 100 ияш лӱмгечыжлан пӧлеклалтше кас эртен.
Ятыр уна дене пырля республикын тӱвыра, савыктыш да калык паша шотышто министрже Константин Ивановат лийын.
– Республикнан да тоштерын 100 ияш лӱмгечыжлан тоштерым уэмден олмыктымым кугу пиаллан шотлыман – тудо ончычсо тӱсшым пӧртылтен. Ме умбакыжат тоштер пашам вияҥден колташ манын, тыршаш тӱҥалына, – палемден министр К.Иванов да культур учрежденийым вияҥден колташлан тоштер вуйлатыше Светлана Зверевалан 100 тӱжем теҥгеаш сертификатым кучыктен.
Тиде кечынак тоштерын пашаеҥже-влакым кугыжаныш награде, почёт грамот, тауштымашан серыш дене палемден.
Национальный тоштер республикыштына ик эн тошто музейлан шотлалтеш. Курым жапыште тудо моткоч кугу пашам шукта – Марий кундемнан поянлыкшым арала, шотла, пога. Тыгак тоштер савыктыме пашам шукта, историй да культур йодыш дене ой-каҥашым пуа да эксперт семын иктешлымашым ышта.
А.БАЙКОВА
Фотом тӱвыра, савыктыш да
калык паша шотышто министерствын
пресс-службыж гыч налме
