16-18 декабрьыште Йошкар-олаште «Тӱвыраште у» тӱнямбал форум эртен. Ты мероприятийын кумшо кечынже ушнаш мыламат пернен. Лекций-влак волонтёр-шамычын пашашт, культур сатум ужалымаш, медиа аланыште тыршыше-влакын сомылышт дене кылдалтыныт.
Т.Евсеев лӱмеш национальный тоштерыште эртыше «Цифран йырвел» секций сайт дене пашам ыштыше-влакым чумырен. Погынышо-шамыч кызытсе технологий да еҥ-влак кокласе кыл нерген мутланеныт. Тӱвырам, сымыктышым арален кодымаште шкешинчымашым, моштымым самырык-влаклан туныктен кодыман. А кузе тидым ышташ лиеш?
Ӱдыр-рвезе-влак интернетыште гына «шинчат» маныда гын, тугеже молан, тиде интернетымак кучылтын, кӱлеш уверым нунын деке намиен шукташ огыл?
Ик тыгай сай полышым VR-технологий-влак пуат. Тоштерым налаш гын, кызыт иктаж сымыктыш арвер-воктене VR-кодым ужаш лиеш. «Сӱретыш» телефон фотокамерым лишемдымеке, тиде арвер нерген кумданрак пален налаш лиеш.
Вес оҥай полышкалыше – чат-бот. Нунын коклаште эн палымыже «Алиса» (андроид телефонышто), «Сири» (айфонышто). Коктынат «шонен» моштат. Садлан неле йодышланат вашмутым муын кертыт.
Нине да моло кӱлеш технологий-влак дене мероприятийын модераторжо Екатерина Насонова палдарен.
Вес лектор-влак участник-шамыч деке онлайн йӧн дене пайдаланен лектыныт. Владислав Маймин, «Moneta.ru» компанийын вуйлатышыже, сайтым «чоҥымо» нерген каласкален. Тудым вияҥдаш, сылнештараш кӱлмӧ дене палдарен. Шке сатум офицал сайт гоч вигак ужалаш гын, сайрак манын. Тидыже налшынат жапшым акла, ужалшынат пашажым куштылемда.
Умбакыже мутым сайт нергенак «Цитрониум» компанийын директоржо Владимир Меранвильд шуйыш. Организаций шке сайтшым ыштыме годым тидым ыштен моштышо деке гына огыл эҥертышаш, чыла пашам тудлан гына огыл ӱшанышаш. Вет тендан тӧнежда нерген программист шагал мом пала.
«Omеga» компанийын вияҥмаш пӧлкажын вӱдышӧ специалистше Станислав Бедерников интернет лаштыкын кӧргӧ сынжым, чоҥалтмыжым ончыктен. «Сайт – тиде йодшын да ыштышын чумыр лектышышт. Ваш мутланен, таҥастарен, икмыняр тӱрлӧ семын ыштен ончен гына сай паша лектеш», – палемден тудо.
Цифран технологий таче кечын мемнан сай йолташна. Садлан тудын дене «келшыман» да тудым чын кучылт моштыман.
О.МОШКИНА
