Мишкан районышто «Айык села – 2020» конкурсын районысо этапше иктешлалтын.
Тушко чылаже 14 ял шотан илем гыч йодмаш пурен. Конкурсыш ушнышо ял ден селалаште ты жапыште айык илыш дене илаш кумылаҥдыше пайдале да кулешан мероприятий-влак эртеныт. Нунын нерген участник-влак ончылгоч ямдылыме видеопрезентаций гоч палдареныт. Шукынжо тыште творческий шӱлышым ончыктеныт, санденак видеролик-влак оҥай да шарнымашеш кодшо лийыныт.
Жюрин иктешлымашыж почеш икымше верыш Кугу Соказа ялсоветын Пӱнчер ялже лектын. Тудак Мишкан районын чапшым республикысе тыгаяк конкурсышто аралаш тӱналеш. Кокымшо ден кумшо Большешадинский ялсовет гыч Изи Шаде ден Ирсай ялсовет гыч Йылыш ял-влак лийыныт. Финалыш лекше-шамычлан окса премийым пуэныт. Тудым нуно шке илемыштым тӱзаташ кучылт кертыт.
Тидын дене пырля ойыртемалтше-влакым эше посна номинацийлаштат палемденыт. Мутлан, Большешадинский ялсовет гыч Кугу Шаде ял, «Национально-культурный пашаште да муниципальный образованийым вияҥдымаште эн кугу сеҥымаш» номинацийыште, Акбулат ялсовет гыч Памаш ял «Еш институтым арален кодымо пашаште эн сай лектыш» номинацийыште, Ардаш ялсовет гыч Эшым ял «Айык йӱла ден илымашке виктаралтше профилактике мероприятий-влакым эртарымаште эн сай лектышыже» номинацийыште да Ирсай ялсовет гыч Кӱшыл Шогертен ял «Эн сайын
физкультурно-оздоровительный пашам эртарымаш» номинацийыште сеҥышыш лектыныт.
С.НОСОВА
