Марий Эл вуйлатыше Александр Евстифеев Россий Федерацийыште региональный вияҥмаш шотышто правительственный комиссийын президиумжын заседанийышкыже ушнен. Тудым видеоконференцкыл йӧн дене Росиий правительстве председательын алмаштышыже Марат Хуснуллин эртарен.
Тушто «Илыме вер да оласе кумдык» национальный проектым илышыш пуртымо нерген мутланеныт. Тыгак илыме верым чоҥаш у кумдыкым ойырымо нерген йодышым каҥашеныт.
Тений, 2020 ийыште, Марий Элыште чылаже 363 тӱжем квадрат метрым чоҥен шуктышаш улыт. 25 декабрь марте шуко пачеран 12 пӧртым илаш шукташ палемдалтеш. Нунын чумыр кумдыкышт – 65,2 тӱжем квадрат метр.
Тыгак «2019-2025 ийлан граждан-влакым аварийный илыме фонд гыч кусарымаш» республиканский адресный программе дене келшышын, чылаже 2879 пӧлемыште илыше 7 тӱжем наре еҥым вес верыш илаш кусараш палемдалтеш.
Марий Эл Республикым вуйлатышын организаций да
аналитике виктемжын уверже-влак негызеш
Л.КАМАЛЕТДИНОВА ямдылен
