Корно туткар
Тиде арнян кок кече жапыште, шочмын да кушкыжмын, республикысе корнылаште ик ДТП-ат лийын огыл! Ӧрмаш, вет тыгайже пытартыш жапыште вашлиялтынат огыл! Тыгодым ГИБДД инспектор-влак нине кечылаште корно правилым 520 утла гана пудыртымым рашемденыт, автомашинам виктараш йӱшывуя шичше 5 водительым кученыт.
Сатужо лийынат огыл
Российысе МВД-н Йошкар-Оласе управленийжын уголовный розыск пашаеҥже-влак еҥ-шамычым тӱрлӧ семын ондалкалыше рвезым кученыт.
Тиде самырык еҥ интернет гоч быт техникым, электроникым, мӧҥгысӧ янлык-влакым «ужалкален». Но чынже дене тудын нимогай сатужат лийын огыл!
Тидын нерген уверым пален налмекышт, уголовный розыск пашаеҥ-влак оперативно-кычалме мероприятийым эртареныт да Йошкар-Олаште илыше 17 ияш рвезым кученыт. Нуно рашемденыт: тудо Авито сайтыште сатум ужалыме нерген уверым вераҥден, вара налаш шонышо-влак деч оксам ончылгоч колташ йодын. А. колтымекышт, йыҥгыртымылан вашештымым чарнен да «йомын».
Нине факт шотышто уголовный делам тарватеныт.
Кызыт оперативник-шамыч тудын Российысе тӱрлӧ кундемыште тыгай йӧн денак 10 преступленийым ыштымыж шотышто тергымашым эртарат.
Москвашке колтен!
Волжск олаште илыше 37 ияш пӧръеҥат 15 декабрьыште лач тыгай йӧн денак ондалалтын. Тудо увер-влакым яра вераҥдыме сайт гоч машинам налаш шонен да 50 тӱжем теҥгеж деч посна кодын.
Тидын нерген туткарыш логалше еҥ полиций пашаеҥ-влаклан шкеже каласен.
Полицейский-влак рашемденыт: пӧръеҥ «Авито» сайтыште «Chevrolet Lacetti» машинам моткочак шулдын ужалыме нерген уверым ужын да «озажлан» йыҥгыртен. Тудыжо автомобиль Москваште манын каласен. Вара ешарен, пуйто налаш кумылан-влак икмынярын улыт, сандене ончылгоч 50 тӱжем теҥгем колташ темлен. Тылеч вара «ужалыше» ӱшандарен: машинам тудлан бронироватлыме. Пӧръеҥ ӱшанен да Москвашке шумеш кудалын! Миен шумекше, саде «ужалышылан» йыҥгыртен. Но тудыжо тетла вашештен огыл. Тунам гына пӧръеҥ ондалалтмыжым умылен да полицийыш увертарен.
Тиде факт шотышто уголовоный делам тарватыме.
Молан йодде шинчын кудалын?
Советский районышто илыше 27 ияш рвезе еҥын машинаж дене Йошкар-Олашке мийымыжлан ынде суд ончылно мутым кучаш тӱҥалеш.
Тений сентябрьыште ик кечын полиций пашаеҥ-влак оперативно-кычалме мероприятийым эртарымышт годым Медведево районысо ик поселкышто «Лада Гранта» машинан водительже ден пассажиржым шогалтеныт. Нуно пассажиржын наркотик веществан пӱтыркажым муыныт да поген налыныт.
Умбакыже рашемдымеке, пален налыныт: 27 ияш водитель шкенжын огыл, а вес еҥын машинаж дене кудалыштын. Тудыжо Советский поселкыш шӱжарже деке Чуваший гыч толшо 26 ияш рвезын лийын. Аракам йӱмӧ деч вара саде унан мален колтымыжым ужынат, автомобиль сравочшым налын да Йошкар-Олашке кудалын. Тушто палымыжым вашлийын. Садыже Медведево районысо ик поселкыш намиен кондаш йодын. Вараже рашемын: тудлан шылтыме вер гыч наркотикым налаш кӱлын улмаш.
Полиций пашаеҥ-влак автомобильым поген налыныт да озажлан пӧртылтеныт.
Тиде преступленийым ыштымыжлан самырык еҥым 5 ий марте жаплан эрык деч посна коден кертыт.
Пожар
Кодшо арнян республикыште 19 вере пожар лийын (эртыше арнян – 24).
Эн шуко – 5 – Медведево районышто, Йошкар-Олаште, Волжскышто — 3 гыч, 2 – Курыкмарий районышто, 1 гыч – Волжский, Звенигово, Кужэҥер, Морко, Параньга, Советский районлаште.
Тул 10 оралтым, 5 техникым пытарен. Пожарыште 3 еҥ колен, икте эмганен.
Туткар утларакше коҥгаш олтымо да электрооборудований дене пайдаланыме годым лӱдыкшыдымылык правилым шотыш налдымылан кӧра лийын.
Любовь КАМАЛЕТДИНОВА
