СПОРТ

Футбол

Кажне ийын 10 декабрьыште футболын тӱнямбал кечыжым палемдат. Тудо Марий Элыштат спортын тӱшкан да шуко еҥлан модаш келшен толшо видше.

Таче кечылан республикыште самырык футболист-влакым футбол да регби дене олимпийский резерван спорт школышто ямдылат. Республикнан куд районыштыжо, тыгак олалаштыжат, 734 спортсменым тренироватлат, а физкультурно-тазаҥдыме программе почеш – 300 утла еҥым.

2020 ий 4 декабрьыште иктешлымаш деч вара Молодёжный политике, спорт да туризм министерствын комиссийжын заседанийыштыже футбол дене пашам ышташ кандаш еҥым ойыреныт. Тидыже ончыкшым регионыштына ты видым вияҥден колташ йєным ышта. Нунылан пашадарым тӱлаш тӱҥалыт, экипировкым пуат. Тыгак официальный спорт мероприятийлаште участвовалаш медико-биологический шымлымашым яра эртат.

Россий спорт министерствын приказше почеш, 2020 ийыште Марий Элыште футбол федераций базовыйлан шотлалтеш.

Марий Эл правительствын полышыжлан кӧра тений спортын ты видшын материально-технический базыжым саемденыт, уэмденыт.

«2016-2020 ийлаште РФ-ыште физический культур ден спортым вияҥдымаш» федерал программым шотыш налын, футболлан 12 миллион теҥгем ойыреныт. Кандаш миллион утла теҥгем федерал бюджет гыч, а кум миллион утла теҥгем – республикын бюджетше гыч Красногорский посёлкышто чоҥымо футбол пасум искусственный леведыш дене петыраш. Тыгак тушко кӱлеш оборудованийым, мутлан, резине пырчым шараш, клейым налаш оксам пуэныт. Мутат уке, тушто ончаш толшо-влаклан теҥгылым, куштыралан верым, тротуарым келышытарат. Ты пасун кумдыкшо 8669,44 квадрат метр лийшаш. Тудым чоҥаш 2021 ий 15 май гыч 1 сентябрь марте жап ойыралтеш.

Базовый статусан улмыжлан «Демографий» национальный проект дене келшышын, «Спорт – илышын нормыжо» федерал проект почеш 2021 ийыште спорт школ субсидийым налын кертеш. Теве тыге кӱлеш инвентарь, оборудований, экипировко дене пойдаралташ, специалист-влакым туныкташат йєн лектеш.

Тургыжландарыше йодышым каҥашен лекмекышт тыгай иктешлымашым ыштеныт: футбол ден регби олимпийский резерв спорт школлан оборудований ден инвентарьым налаш кум миллион наре теҥгем пуаш.

Теве субсидий мыняр лийшаш, вет статистике почеш Марий Элыште футбол дене 19 тӱжем 235 еҥ пеҥгыде кылым куча да спортын моло видше дене таҥастарымаште шуко еҥын модмо видшылан шотлалтеш.

Футболын пайдаже

Футбол – тыглай пасушто модмо спорт. Тудын кресачажлан англичан-влак шотлалтыт. Спортын ты видше «football» мут гыч лектын: «foot» – йол, «ball» – мече. Английыште 1863 ийыште лач тиде модышлан тӱҥ правилым ыштеныт. А футболын тӱнямбал ассоциацийжым (ФИФА) 1904 ийыште пеҥыдемденыт. Тудо чылаже 204 национальный федерацийым чумыра. Российыш футбол 19 курым мучаште толын шуын. Таче кечылан футбол дене 3 миллион утла еҥ модеш. Спортын ты видше, – мутат уке, капкылым физически пеҥгыдемдымаште, тазалыкым шуарымаште ик эн шарлыше да кажне еҥлан модаш лийше тӱшка модыш. Футбол чогашылым, луым пеҥгыдемда.

Футбол – команде дене модмо вид, сандене тыште икте-весым умылымаш шочеш, кумыл саемеш, койыш-шоктыш пеҥгыдемеш.

Тыгодым нерв да вӱргорно системе черан, тыгак начарын ужшо-влаклан модаш ок лий.

Йошкар-Олаште футболла модаш кумылан-влаклан физический культур, спорт да туризм министерстве пелен СДЮШОР уло. Спортсмен-влак «Арена» манежыште, «Спартак» спорт залыште, «Спартак», «Витязь» ФОК-ышто, а кеҥежым «Дружба», «Олимп», «Молодёжный» стадионлаште, яндар южышто тренироватлалтыт.

Спортын ты видше дене 7 ияш гычак пеҥгыде кылым кучаш лиеш. Тушко тазалык шотышто 1-ше тӱшкаш пурышо (иктаж-могай чер дене диспансер учётышто шогыдымо) йоча-влакым налыт. Икманаш, чытышан улыда гын, тугеже футболла модса.

Палаш оҥай:

Спортын команде дене модмо видше-влак писылыкым, раш ужын да шижын моштымым пӱсемдат, дисциплиным, коллективизмым пеҥгыдемдат, тарванылмын координацийжым, шинча пӱсылыкым саемдат, умылыдымаш лекме годым шкем кучаш туныктат, ик ойым муаш полша.

· 2020 ийыште футбол тургым иктешлалтын. Тений Марий Элын чемпионатыштыже икымше ден кокымшо верым Йошкар-Ола гыч «ЗПП» ден «РМТ» команде-влак налыныт. Кумшо – Курыкмарий район гыч «Арсенал» команде.

· Шукерте огыл мини-футбол дене Марий Элын первенствыже иктешлалтын. Икымше верым Шернур район гыч «Сокол» команде налын.

· 2020 ийлан сокыр-влак коклаште мини-футбол дене элнан сборный командышкыже Марий Элысе спортивно-адаптивный школ гыч 14 воспитанник логалын.

Е.ЭШКИНИНА

Опубликовать в Одноклассники

Добавить комментарий