АКЦИЙ КОНКУРСЫ

Тулык йоча-влакым саламлен

Ий еда эртаралтше «Йӱштӧ Кугызан НТВ дене пырля путешествийже» акций кышкарыште Великий Устюг гыч Йӱштӧ Кугыза НТВ телеканалын командыж дене пырля Марий Элысе «Солнышко» йоча интернат-пӧртын воспитанникше-влакым шушаш У ий дене саламлен.
Тудо икшыве-шамыч дене онлайн режимыште мутланен, нуным шушаш пайрем-влак дене саламлен да у ий пӧлек-влакым: тӱрлӧ пушкыдо модышым, курчакым, ӱстембал модышым, машинкым да кажне йочалан шере кочкышым, — колтен, тыгак – вич метр кӱкшытан кож ден тудым сӧрастараш модышым.
Вашешыже ӱдыр-рвезе-шамыч Йӱштӧ Кугызалан почеламутым лудыныт, у ий мурым муралтеныт.
Акций ынде визымше ий эрта. Тудын тӱҥ шонымашыже у ий чудо ден юзо пӧлекым вучышо-влаклан, поснак ойыртемалтын вияҥше, черле, тулык да ача-ава ончымо деч посна кодшо йоча ден неле илыш ситуацийыш логалше еш-шамычлан полшымашке виктаралтын.
«Йӱштӧ Кугызан НТВ дене пырля путешествийже» акций Вологодский областьын правительствыжын, «Российыште порылык» волонтёр проектын да #МеПырляУлына вашла полшымо общероссийский акцийын полшымышт, тыгак школышто тунемше-влакын «Кугу перемен» всероссийский конкурсыштын участвоватлымыж дене эрта. Тений проект элнан тӱрлӧ луклаштыже верланыше 35 олам авалта.
М.ИВАНОВА

 
Опубликовать в Одноклассники

Добавить комментарий