«МАРИЙ ЭЛ» ТАЧЕ

«Марнетын шӱдыржӧ»

Марий Элын Тӱвыра, савыктыш да калык паша шотышто министерствыжын увертарыме «Марнетын шӱдыржӧ» марий йылме дене сайт-влакын конкурсышт иктешлалтын.

Марий Эл» газет редакцийнан сайтше «Марий йылме дене лекше печатный СМИ-н эн сай сетевой версийже» номинацийыште палемдалтын. Каласен кодыман, газетнан электрон версийже 2012 ий гычак пашам ышта. Тудым пойдарен толмо верч уло коллектив тырша. Санденжат тудо, чынжымак, марла лекше тыгай савыктыш коклаште республикыштыжат ик эн виян. Тыглай илышыште кеч-могай событий лиешат, тудын нерген ме вигак сайтышкына уверым вераҥдашак тыршена, вет печатный газетна лудшо-влак деке почто гоч изиш варашрак миен шуэш. Марий-влакын тӱшкан илыме кундемлаштыжат тудлан возалтше-шамыч ятырын улыт. Соцкыллаштат газетнан шкенжын тӱшкаже-влак улыт. Нунын гоч ме лудшына-влак дене кылым пеҥгыдемденак толына. Тачысе кечылан «Марий Элым» почто гоч 3764 еҥ налын лудеш гын, электрон версийжым — 2836 еҥ.

«Тӱвыра учреждений, образовательный организаций-влакын эн сай сайтышт» номинацийыште республикысе Марий тӱвыра рӱдер сеҥен.

«Марий калыкын тӱвыражлан, искусствыжлан, йылмыжлан, историйжылан, религийжылан да йӱлажлан пӧлеклалтше эн сай тематический сайт» номинаций Валентина Семенован «Тылат кидем» сайтше сеҥымашым конден.

«Эн сай авторский интернет-дневник (блог, микроблог)» номинацийыште кок сеҥышым ойыреныт: Наталья Венина («Марийский язык с Натальей Вениной») ден Алексей Рыбаковым («Моско марий тӱвыра рӱдер (Центр притяжения марийской культуры в Москве)».

С.НОСОВА

Опубликовать в Одноклассники

Добавить комментарий