Марий Элыш коронавирус инфекций деч профилактикылан «Гам-КОВИД-Вак» комбинироватлыме векторный вакцинын 200 дозыжым конденыт.
Прививкым тӱҥ шотышто столицынан рӱдоласе медицине организацийлаштыже тыршыше пашаеҥ-влаклан ыштат.
— «Гам-КОВИД-Вак» вакциным Россий Минздравын Гамалея лӱмеш Микробиологий да эпидемиологий национальный рӱдерыштыже айдемын аденовирусшо негызеш ямдылыме. Тудын геномыштыжо иммунный вашмутым лукшо SARS-CoV-2 S-белокын ужашыжым кодироватлыше ешарыш уло. Врач-аллерголог-иммунолог семын каласен кертам, тиде вакциныште чот токсинан але умылаш лийдыме нимо уке. Сандене тудын лӱдыкшыдымылыкшӧ шотышто тургыжланаш огеш кӱл, — палдара тазалыкым аралыме министрын алмаштышыже Татьяна Бастракова.
Кызыт РФ Минздрав ден Тазалыкым аралыме сферыште надзор шотышто федеральный службо нормативный базым уэмдат, Профилактический прививке национальный календарьыш вашталтыш пурталтеш, да тылеч вара уло калыкым иммунизироватлаш лиеш. Прививкым эн ончычак 18-60 ияш медик, педагог, социальный пашаеҥ, элкӧргӧ паша органлаште тыршыше, сакыр диабет, шӱм-вӱргорно да бронхо-шодо гай хронический черан пациент-шамычлан ыштат. 60 ий деч кугурак-влакым клинике шымлымашым мучашлыме семын вакцинироватлат. 2020-2021 ийлаште элыштына илыше чумыр калыкын 60 процент ужашыжлан прививкым ышташ палемдыме.
«Гам-КОВИД-Вак» вакцине кок клинике шымлымашым эртен, тушто 38 еҥан кок группо шке кумылын участвоватлен. Чыла доброволецын инфекций ваштареш иммунитет лектын.
— Коронавирус инфекций деч вакцинаций – COVID-19 деч панацей огыл гын, черын вияҥмыжым виктараш полшышо кӱлешан мероприятий, — палемда тазалыкым аралыме министрын алмаштышыже Татьяна Королева.
Прививкым ыштыме деч ончыч пациентын тазалыкшым врач терга. Пациент вакцинироватлалташ келшымыжым кагазыште пеҥгыдемда. Прививкым нигӧ нигӧлан виеш огеш ыште!
М.ИВАНОВА