САМЫРЫК ТУКЫМ

       Вуйым сакаш ида вашке

Самырык-влакын пашаштым эскеретат, марий калыкын волгыдо ончыкылыкшо верч ӱшан лектеш. Тачысе унанат тӱвыра, йылме верч тургыжлана. Мутем Марий кугыжаныш университетын  студентше Михаил Феофанов нерген.

Рвезе Провой кундемыште шочын, изиж годым ешыж дене Килемар район Куплоҥга ялыш илаш кусненыт.

– Республикна изи гынат, район-влак икте весе деч ойыртемалтыт. Кузе тый,  олыкмарий рвезе, чылт курыкмарийыш савырненат?

– Тиде ойыртем дене йоча годымак вашлиялтмылан кӧра, йылмым тунеммаште нелылык лийын огыл. Адакшым авам ту кундемыште шочын-кушкын, коча-ковам курыкмарий улыт. Ондак пеле рушла, пеле марла кутыраш тӧченам. Йырым улшо еҥ-влак воштылыныт, нунылан оҥайын чучын.

Ончыч верысе ӱдыр-рвезе-влак дене вашкылым ышташ нелырак ыле. Мыйым, тора гыч толшым, шке коклашкышт пешыже пуртен огытыл. Тидыже вурседылмашкат, кучедылмашкат шуктен. Жап гыч тиде йоча орадылык койыш мондалтын. Кызыт ме лишыл йолташ-влак улына.

– Тый мер илышыште шкендым тергет. Тӱрлӧ мероприятий кокла гыч ик эн шарнымашеш кодшыжо дене палдаре.

– Кажныже чонемлан шерге. Нуно ала-молан гынат туныктеныт,  шуко у йолташ дене ваш ыштеныт.

Школышто тунеммем годым чолга улмемлан кӧра «Золотое кольцо» мучко экскурсий дене каяш темленыт. Ялысе рвезылан тиде – пиал. Тыге икымше гана Москва, Ярославль, Ростов олалам ужынам.

«Каменная речка» каныме базе кумдыкышто эртыше финн-угор калык-влакын лагерьыште лийынам. Кок гана Марий самырык тукым слётышко, ныл гана Школ лесничестве слётышко ушненам. Нине мероприятий-влакат илышыштем поро, келге кышам коденыт.

–  Университетыште химий направленийым ойырен налынат. Мо дене ты специальность шкеж деке савырен.

Ача-авам мыйым врачым ыштынешт ыле. Кӱлеш экзаменым кучымек, Ижевск, Киров, Самара олалаш йодмашым колтымо. Погымо балл тунемаш пураш изиш ситен огыл. Тыге, тунемме тӧнежым кычалме годым, МарГУ-со нефтехимий направлений шинчамлан пернен. Мутшак, очыни, сымыстарен.

Кызыт тунемме дене пырля шанче пашам вӱдем. Теве шукерте огыл «Естественный шанче да медицинын кызытсе проблемыже» сборникыш «Кобальт иминодиацетатым лукмаште да шымлымаште кум карбонат кобальт натрийын синтез ден анализше» статьям лектын. «Айдеме – тиде раствор», – тыге воштылыт туныктышына-влак.  Мемнан кап-кылыштына тӱрлӧ вещества-влак улыт. Ме кандашле процент вӱд гыч шогена. Пашам тидым шымлымашлан пӧлеклалтын.

– Спорт дене кылым кучет?

– Куржталаш йӧратем, футбол, волейбол, баскетбол дене модаш келша.  Ече дене таҥасымаште кугыеҥ-влак коклаште икымше разрядым араленам.

– Миша, марий калык курымеш илыже манын, мом ме ыштен кертына?

Марла кутырен огына мошто гын, шкеннам марий улына манашыжат неле. Садлан йылмым палыме йодыш – ончыл верыште. Тудым тунемаш, пагалаш, йӧраташ кӱлеш. Шочмо тӱвыра деч вожылман огыл.

– Самырык лудшына-влаклан могай тыланымашет лиеш?

Шонымашдам шукташ тыршыза. Иктаж-можым ыштен огыда мошто гын, вуйым сакаш ида вашке, умбакыже тыршыза. Ида вожыл, тӱрлӧ мероприятийлаш чӱчкыдын ушныза.

Тау. Ончыкылык корнет волгыдо лийже.

– Тау!

О.МОШКИНА

Опубликовать в Одноклассники

Добавить комментарий